VAZHDON KALVARI I EMIGRANTËVE SHQIPTARË

NË KUFI ME GREQINË

26.08.2002 

Pas një vale të parë dyndjesh të emigrantëve shqiptarë në postat kufitare të Kapshticës dhe të Kakavijës, po përsëritet po ajo situatë e rëndë.  Përsëri me mijëra janë ata emigrantë, bashkë me familjet e tyre, që janë bllokuar në kufi.  Ata po përballen me probleme tepër shqetësuese; ka gra që presin të lindin si dhe fëmijë të prekur nga sëmundje të ndryshme.  Njoftohet së fundi se një grua 63- vjeçare ka gjetur vdekjen në Kakavijë.

KSHH u shpreh që në rastin e parë duke denoncuar mospërfilljen e autoriteteve greke dhe angazhimin e pamjaftueshëm të autoriteteve shqiptare për të arritur një zgjidhje të shpejtë dhe përfundimtare.  Përballë këtij kalvari të vërtetë të mijëra emigrantëve që janë të detyruar të presin me ditë të tëra për një vulë në kufi, KSHH ripohon qëndrimin e tij denoncues.  Edhe një herë del në pah përgjegjësia e rëndë e autoriteteve greke që jo më shumë se brenda një jave po krijojnë një krizë të re.

Veçanërisht u bëhet thirrje autoriteteve shqiptare që të vihen në lëvizje për të bërë përçapjet e duhura pranë autoriteteve të Athinës, në nivelin më të lartë, që t'i jepet fund kësaj situate, e cila në shumë raste gjatë këtyre ditëve është interpretuar si diskriminim ndaj emigrantëve dhe shprehje e një psikoze antishqiptare.

Pa qenë nevoja që t'u bëjmë jehonë këtyre interpretimeve, ne vërejmë se ajo që po ndodh në kufi me Greqinë është në kundërshtim të hapur me klimën e tanishme të marrëdhënieve miqësore midis dy vendeve dhe me normat më elementare të të drejtave të njeriut.

KSHH i drejtohet po ashtu homologut të vet në Greqi, Vëzhguesit Grek të Helsinkit që të ndërmarrë një fushatë sensibilizuese kundër këtyre qëndrimeve arbitrare, duke denoncuar sjelljen e papranueshme të autoriteteve kufitare greke.

Kalvari i emigrantëve shqiptarë në kufi duhet të marrë fund.