DY ORGANIZATA PRESTIGJIOZE

DENONCOJNË SHKELJET E RËNDA TË TË DREJTAVE TË NJERIUT

NË GREQI

26.09.2002

Është bërë e njohur gjerësisht në shtyp se dy organizata ndërkombëtare të të drejtave të njeriut me reputacion në shkallë botërore, Amnesty International dhe Federata Ndërkombëtare e Helsinkit kanë denoncuar në një raport të posaçëm shkeljet e të drejtave të njeriut në Greqi.

Ndërmjet viktimave të shumta një vëmendje të veçantë tërheqin emigrantët shqiptarë që kanë qenë objekt dhune shumë shpesh në rrethana të ndryshme. KSHH solidarizohet plotësisht me raportin e mësipërme dhe aq më tepër që ai ka sjellë herë pas here raste të shumta të keqtrajtimit të emigrantëve shqiptarë.

Së pari, në raport janë denoncuar rastet kur ata kanë vuajtur përgjithësisht nga një psikozë antishqiptare dhe në shumë raste nga diskriminimi mbi bazën e paragjykimeve raciste. KSHH nuk ka pasur mundësi të vëzhgojë situatën në vend për arsye që mund të kuptohen fare mirë. Por KSHH ka marrë vazhdimisht ankesa nga shumë emigrantë që janë përballuar me dhunën e policisë greke gjatë qëndrimit të tyre në qytete të ndryshme të Greqisë. Veçanërisht të rënda kanë qenë aktet e dhunës që janë kryer në dëm të emigrantëve shqiptarë në kufi. Ngarjet e kohëve të fundit janë një provë e qartë.

Përveç këtyre shkeljeve, KSHH ka marrë ankesa edhe nga të burgosur shqiptarë që vuajnë dënimin në burgjet e Greqisë. Edhe pse nuk ka qenë i mundur të vendoset një kontakt i drejtpërdrejtë, gjithsesi janë mbledhur të dhëna, janë marrë letra e telefonata për keqtrajtim të rëndë të tyre në dallim nga të burgosurit e tjerë. Shpesh herë ata kanë kërkuar riatdhesimin e tyre në Shqipëri për të vuajtur dënimet këtu.

Në këto rrethana, KSHH tërheq vëmendjen e autoriteteve për këtë problem, që sipas raportit të mësipërm paraqitet tepër i mprehtë. Mund të pritet që kjo çështje të bëhet objekt diskutimi midis autoriteteve kompetente të të dy palëve. Kjo është aq më tepër e udhës kur kemi parasysh Traktatin e miqësisë lidhur midis dy vendeve në mars 1996, në të cilën minoriteti grek në Shqipëri dhe emigrantët shqiptarë në Greqi cilësohen si “një urë e zhvillimit të vazhdueshëm të marrëdhënieve midis dy palëve”.