NJË AKT TJETËR DHUNE NGA ANA E POLICISË MAQEDONASE

27.11.2001 

KSHH i rikthehet edhe një herë dhunës dhe sjelljes brutale të policisë maqedonase kundrejt qytetarëve shqiptarë që shkojnë në Maqedoni në rrugë të ligjshme.

Në KSHH u paraqit Z. Xhevahir Spahiu, që është edhe anëtar i bordit të këtij Komiteti, për të përcjellë ankesën e një grupi njerëzish të kulturës që shkuan në Tetovë për të marrë pjesë në veprimtarinë kulturore "Ditët e Naimit". Në grup bënin pjesë poetët Pano Taçi, Shane Muda dhe aktori Mirush Kabashi. Këta personalitete të njohura të kulturës shqiptare janë ndalur nga policia pranë qytetit të Kërçovës, ku janë mbajtur me orë të tëra në gjendje arresti duke iu nënshtruar një hetimi të vërtetë me pyetje provokative. Poetët e indinjuar më plot të drejtë e kanë quajtur  arrestimin e tyre si "arrestim të gjuhës shqipe".

KSHH ka përvojën e vet të hidhur me policinë maqedonase, kur përfaqësuesit e tij janë ndalur në kufij për të vetmen arsye se kishin me vete botime në gjuhën shqipe, të cilat edhe u sekuestruan nga policia maqedonase. Në adresë të këtij Komiteti kanë mbërritur edhe dëshmi të tjera të një keqtrajtimi të tillë. Ky rasti i fundit është edhe më tepër i rëndë sepse tregon që kjo dhune vazhdon edhe tani kur mund të pritej një atmosferë e re si në marrëdhëniet maqedono-shqiptare në vetë Maqedoni pas marrëveshjes së Ohrit, ashtu edhe me shqiptarët që shkojnë atje nga Shqipëria fqinje me mesazhe paqeje dhe bashkëpunimi.

KSHH bashkohet me indinjatën e shprehur prej këtyre personaliteteve dhe njëherazi mendon se, me përmasat që ka marrë kjo dukuri, kjo sjellje brutale nuk duhet të mbetet si një incident i radhës pa vëmendje, por mendojmë se duhet të shtrohet edhe në planin zyrtar midis dy vendeve.