Një raport mbi Greqinë nga Komiteti Evropian

për parandalimin e torturës dhe trajtimit ose ndëshkimit çnjerëzor ose poshtërues

 Tiranë më 02.12.2002

Komiteti i lartpërmendur ka për funksion të ndjekë situatën në çdo vend Evropian dhe të hartojë raporte të veçanta për sa i përket shkeljeve që janë vërejtur në këtë drejtim.

Raporti vë në dukje një varg shkeljesh të kryera nga policia greke qoftë në kufi, apo edhe në burg.  Në raport përmenden edhe raste të keqtrajtimit të qytetarëve shqiptarë qoftë në kufi apo në kushte burgimi.  Komiteti ka konstatuar një sjellje poshtëruese të policisë greke ndaj të burgosurve emigrantë, veçanërisht kundrejt atyre me origjinë shqiptare.

Komiteti Grek i Helsinkit, duke ia përcjellë Komitetit Shqiptar të Helsinkit raportin e lartpërmendur, thekson se bëhet fjalë për një ksenofobi të përgjithshme në qëndrimin e policisë greke.  Ai denoncon atë që e quan klimë "albanofobie" midis zyrtarëve grekë të ngarkuar me zbatimin e ligjit.

Komiteti grek shton se vërejtjet dhe konkluzionet e arritura nga Komiteti për parandalimin e torturës dhe të trajtimit çnjerëzor konfirmojnë plotësisht denoncimet e bëra gjatë viteve nga komiteti grek si dhe rezultatet e vëzhgimeve të fundit të kryera bashkërisht nga Amnesty international dhe Federata Ndërkombëtare e Helsinkit.