Dënojmë rrugaçërinë vandale dhe ksenofobe

Tiranë, më 30 Mars 2005

Sipas njoftimeve të shtypit, në ndeshjen e futbollit të datës 29 Mars 2005 që u zhvillua në Athinë midis skuadrave të futbollit të Greqisë dhe Shqipërisë, ndodhën incidente që u shoqërua me parrulla antishqiptare duke arritur deri atje sa në mënyrë publike të digjej, grisej apo hiqej simboli i shtetit tone: Flamuri Shqiptar.

Provokatorë të këtij fenomeni të përsëritur ishin grupet ekstremiste greke me ndjenja të theksuara ksenofobe që synojnë të cënojnë klimën e miqësisë midis vendit tonë dhe Greqisë.

Komiteti Shqiptar i Helsinkit (KSHH) e denoncon fuqishëm këtë akt vandal të shovinizmit ekstrem me doza të theksuara fashiste dhe kërkon që fajtorët të vihen para përgjegjësisë ligjore. Është e vërtetë se pas asaj që ndodhi, policia greke ndaloi apo arrestoi në flagrancë ndonjë person, por KSHH mendon se detyra kryesore ishte të parandalohej kjo ngjarje e hidhur dhe e dënueshme.

KSHH nuk pajtohet me faktin që ndërsa tifozët shqiptarë emigrantë në Greqi privohen për të marrë bileta si të gjithë të tjerët, për të ndjekur ndeshjen, naziskinët e rinj, të prirur për të ngjallur urrejtje ndaj shqiptarëve lejohen të ndjekin ndeshjen dhe të ndërmarrin veprime ekstreme të dënueshme edhe nga opinioni i shëndoshë grek.

Komiteti Shqiptar i Helsinkit shpreh konsideratën e tij për atë pjesë të mediave greke, të disa intelektualëve greke si dhe Federatës Greke të Futbollit që dënuan menjëherë aktin e mësipërm.

KSHH, me këtë rast i drejtohet Qeverisë së Republikës së Shqipërisë dhe posaçërisht Ministrisë së Jashtme të Shqipërisë që të ndërhyjë pranë autoriteteve përkatëse greke duke kërkuar që fajtorët të ndiqen me përparësi duke marrë masa që raste të tilla të mos përsëriten në të ardhmen.

Rasti i fundit tregoi në mënyrë të hapët dhe bindëse se provokatorë nuk janë shqiptarë por grupe të caktuara me tendenca të theksuara kesenofobe që duan të pengojnë marrëdhëniet e miqësisë midis dy vendeve.

KSHH u bën thirrje gjithashtu organizatave joqeveritare greke të angazhuara në fushën e mbrojtjes së lirisë dhe të drejtave të njeriut të reagojnë ndaj akteve të tilla duke kontribuar kështu në krijimin e klimës së bashkëpunimit dhe mirëkuptimit midis popujve tanë.