VAZHDON BLLOKIMI I BOTIMEVE SHQIP NGA POLICIA MAQEDONASE

03.10.2002

Sipas njoftimeve të fundit bëhet e ditur se policia maqedonase në kufi bllokon botimet ne gjuhën shqipe. Kësaj radhe është fjala për gazetat që udhëtarët marrin me vete kur shkojnë në Maqedoni. Çdo orvatje për të kaluar qoftë edhe një numër gazetë shqip ndesh në mohimin këmbëngulës të organeve kufitare maqedonase për të lejuar kalimin e tyre. Shumë prej atyre që udhëtojnë për në Maqedoni kontrollohen rreptësisht në pikën kufitare dhe policia maqedonase ndalon çdo kojpe gazete në gjuhën shqipe.

Kjo nuk është një praktikë e re. KSHH ka një eksperiencë të hidhur lidhur me këtë çështje. Disa kohë më parë me dhjetra, kanë qenë vëllimet me dokumenta të të drejtave të njeriut që janë sekuestruar në pikën kufitare të Qafë Thanës për të vetmen arsye se dokumentat ishin të botuara në përkthimin shqip. Ato nuk janë kthyer asnjëherë. Ka patur edhe raste të tjera të kësaj natyre. Nuk kanë qenë të rralla edhe rastet kur policia maqedonase ka ndalur në kufi drejtues të institucioneve shkencore dhe të organizatave joqeveritare dhe i kanë mbajtur në kufi me orë të tëra për të kontrolluar sendet e tyre personale.

Mund të mendohej se në situatën e re të krijuar pas marrëveshjeve të fundit për kapërximin e krizës maqedonase, marrëveshje që për më tepër njohin zyrtarisht barazinë e gjuhës shqipe kundrejt asaj maqedonase, kësaj praktike arbitrare do t’i jepej fund një herë e përgjithmonë.

KSHH persërit protestën e tij për këtë qëndrim intolerant të policisë maqedonase. Mund të jetë rasti që çështja të shtrohet edhe në rrugë zyrtare dypalëshe për t’i dhënë fund censurës që policia maqedonase vazhdon të ushtrojë kundrejt botimeve në gjuhën shqipe.

Në të njëtjën kohë KSHH do t’i drejtohet homologut maqedonas Komitetit të Helsinkit në Shkup për t’i shprehur shqetësimin e vet dhe për të kërkuar që të ngrejë zërin kundër këtij qëndrimi të dhunshëm të policisë maqedonase.