Fajtorët para përgjegjësisë

07.09.2004

Komiteti Shqiptar i Helsinkit dënon sulmin e egër vdekjeprurës në ishullin Zakinto të Greqisë ndaj emigrantit shqiptar Halil Palushi, vetëm sepse ai demonstroi gëzimin e tij të natyrshëm dhe të ligjshëm për fitoren e ekipit shqiptar në ndeshjen e futbollit Shqipëri-Greqi që u zhvillua në Tiranë në 4 shtator 2004.

Sipas njoftimeve të agjensive të huaja dhe të medias shqiptare, po për këtë shkak, në disa qytete greke u keqtrajtuan edhe emigrantë të tjerë shqiptarë, madje pati edhe shtrime në spitale.

KSHH shpreh ngushëllimet e tij të thella për familjen dhe të afërmit e viktimës, ndërsa të lënduarve u uron shërim të shpejtë.

KSHH, aktet e mësipërme të dhunës i konsideron si fenomene tepër negative që cënojnë atmosferën e shëndoshë midis popujve tanë dhe që mbartin elemente të një patriotizmi të sëmurë, të ekstremizmit, ksenofobisë dhe rrugaçërisë. Akte të tilla nuk kanë asgjë të përbashkët  me frymën sportive që shërben si urë lidhjeje midis popujve ku konkurenca e ndershme dhe profesionale kërkon mbështetje, respekt dhe inkurajim.

KSHH përshëndet me këtë rast deklaratën e zëdhënësit të Qeverisë Greke që dënon hapur dhe në mënyrë kategorike incidentet e vërtetuara dhe që premton marrjen e masave përkatëse për vënien e fajtorëve para përgjegjësisë ligjore.

KSHH do të dëshironte që raste të tilla të mos përsëriteshin në të ardhmen, ndërsa ato që ndodhën, të mos shoqëroheshin me pasoja të tjera të dëmshme.

KSHH e sheh të nevojshme që të rikujtojë mesazhin e freskët të lojrave olimpike për paqe, barazi dhe vllazërim për shpalosjen e kulturës, arritjeve dhe të traditave të çdo vendi për miqësi dhe mirëkuptim midis popujve.