Ndal dhunes se policise greke ndaj shqiptareve

Duke iu referuar shtypit të shkruar dhe verifikimeve të korrespondentëve të Komitetit Shqiptar të Helsinkit (KSHH), janë raportuar disa raste ku forcat të policë ushtarake greke, në afërsi të pikave të kalimit të kufirit shqiptar ka ndalur dhe keqtrajtuar mizërisht shtetasit shqiptarë të ardhur nga zona të ndryshme të vendit si: Elbasan, Tiranë, Pogradec, Devoll, Cërrik etj. KSHH ka dënuar edhe më parë këtë akt barbar të policë greke dhe ka kërkuar që personat përgjegjës të vihen përpara ligjit. Një nga këto raste është denoncuar gjithashtu, edhe nga Vëzhguesi Grek i Helsinkit (Greek Helsinki Monitor) dhe Amnesty International.
Në këtë letër të hapur, KSHH kërkon nga qeveria greke, t’u japë fund këtyre akteve të dënueshme edhe nga vetë legjislacioni i brendshëm grek. Këto akte janë diskrimnuese ndaj emigrantëve shqiptarë dhe janë të papajtueshme me standartet ndërkombëtare. Gjithashtu, KSHH ka kërkuar edhe më parë nga autoritetet shqiptare të mbrojnë të drejtat e emigrantëve shqiptarë në Greqi.

Për arsye të situatës së varfër ekonomike në Shqipëri dhe duke patur parasysh nivelin e lartë të papunësisë në vend, një pjesë e qytetarëve shqiptarë, kanë qenë të detyruar të emigrojnë në vendet fqinjë, duke përfshirë këtu edhe Greqinë. Duke mos patur mundësi për t’u pajisur me dokumenta të rregullta për të hyrë në territoret greke, një pjesë e këtyre shtetasve kanë qenë të detyruar të emigrojnë në mënyrë ilegale. KSHH tërheq vëmendjen drejt faktit se pjesa dërrmuese e emigrantëve shqiptarë me banim në Greqi, punojnë në mënyrë të ndershme për të kontribuar në mirëqënien e familjeve të tyre.

Ndërmjet këtyre emigrantëve, ka patur edhe persona të cilët kanë kryer akte kriminale dhe rrjedhimisht vuajnë dënimin e tyre në burgjet greke. Por, herë pas here, ka patur raste të raportuara në lidhje me mosrespektimin e të drejtave të të ndaluarve, arrestuarve dhe të dënuarve, të drejta të garantuara në dokumenta ndërkombëtarë dhe vetë legjislacionin e brendshëm grek.

Qarqe të caktuara greke, dhe nganjëherë, ndonjë media greke, ka kultivuar farën e mosbesimit, urrejtjes dhe ksenofobisë, veçanërisht ndaj emigrantëve shqiptarë dhe kjo ka çuar në faktin që ata janë paragjykuar për kryerjen e akteve kriminale, madje edhe në rastet kur nuk kanë qenë të përfshirë në to. Kështu, principi i prezumimit të pafajësisë, është shkelur në mënyrë flagrante në shumë raste. Kjo frymë antidemokratike dhe antihumane, është denoncuar nga fëmijë të emigrantëve shqiptarë, e madje dhe nga fëmijë grekë në Parlamentin Rinor në Athinë i cili është organizuar këto kohët e fundit.

Duke përfunduar, KSHH thekson se të tilla akte të dënueshme dhe qëndrimet e përmendura më sipër vijnë në kundërshtim flagrant me Konventën Evropiane për të Drejtat e Njeriut, Konventën Evropiane për Parandalimin e Torturës dhe Trajtimit ose Dënimit Çnjerëzor ose Poshtërues dhe akteve të tjera ndërkombëtare.  Me keqardhje vërejmë se këto akte janë kryer në territorin e një vendi i cili është anëtar i Bashkimit Evropian.