NJË RAST KEQTRAJTIMI TË RËNDË NGA POLICIA GREKE

Reagim i një grupi gazetarësh

KSHH ka marrë një thirrje proteste nga gazetarë të shtypit dhe mediave të prefekturës së Elbasanit. Aty shtrohet keqtrajtimi i rëndë, çnjerëzor që i është bërë një djaloshi 15 vjeçar  nga policia greke, që ka patur si pasojë paralizimin e tij. KSHH ka reaguar edhe në raste të tjera kundër brutalitetit dhe akteve çnjerëzore të policisë greke në dëm të emigrantëve shqiptarë veçanërisht në zonën kufitare.

KSHH solidarizohet plotësisht me protestën e gazetarëve të Elbasanit dhe vendosi që ta përfshijë atë në një nga buletinet mujore, nëpërmjet të cilave shkeljet e të drejtave të njeriut i bëhen të njohura si opinionit të brendshëm edhe atij të jashtëm.

Apel-Protestë

Ne, gazetarët e Prefekturës Elbasan, të medias së shkruar dhe vizive, lokale dhe qendrore, shprehim keqardhjen tonë dhe njëkohësisht dhe indinjatën njerëzore për aktin barbar dhe antinjerëzor të kryer nga policia greke në afërsi të Kosturit, në fund të muajit maj, ndaj emigrantëve shqiptarë. Rasti në fjalë flet për plagosjen me armë zjarri automatike të 15 vjeçarit Afrim Salla, i biri i Nezirit dhe Sultanes, nga fshati Plangaricë i komunës Gracen, të qarkut të Prefekturës Elbasan. Ky 15 vjeçar që udhëtonte për të gjetur punë për bukën e gojës, në prani të të vëllait dhe të bashkëfshatarëve të tjerë, ka mbetur në vend i gjymtuar nga një plumb që i ka përshkuar shtyllën kurrizore duke i prerë palcën e kurrizit. Në këtë gjendje, pasi i është hequr plumbi në Kostur dhe është çuar për mjekim në Selanik, pala greke nuk ka bërë asnjë përpjekje për normalizimin e pasojave që vijnë nga kjo plagosje e shkallës së lartë e cila ka bërë që 15 vjeçari Afrim Salla të mbesë i paralizuar.

Apeli ynë dhe protesta jonë i drejtohet opinionit publik shqiptar kudo që ndodhet ai, se shqiptarët nuk janë kuaj që duhen asgjësuar, por janë njerës që kërkojnë të drejtat e tyre. Për këtë, protestojmë ndaj qeverisë greke e cila ka heshtur dhe nuk ka mbajtur asnjë qendrim ndaj shkaktarëve që i sollën sakatosjen 15 vjeçarit Afrim Salla, këtij minoreni që e ka emrin njeri. Ne gjithashtu i bëjmë apel qeverisë shqiptare që të protestojë pranë ambasadës së qeverisë greke në Tiranë për të dënuar aktin anti njerëzor të policisë greke, si i paprecedent për një shtet që pretendon se mbron të drejtat e njeriut.

Ne u bëjmë apel institucioneve shtetërore, komunës, qarkut, prefekturës, por edhe institucioneve të larta të shtetit, si edhe të gjithë institucioneve humanitare, joqeveritare, që të tregojnë kujdesin njerëzor ndaj një 15 vjeçari, gjendja e të cilit kërkon ndërhyrje të specializuar mjekësore në qendra profesionale rehabilitimi jashtë shtetit.

Është në nderin e  çdo qytetari dhe të çdo shqiptari të ngrejë zërin për këto raste flagrante, kur policia greke vret shqiptarët. Për një rast të tillë, nga ana e qeverisë greke, do të ishte  trokitur deri në portat e OKB-së, në të kundërt kjo nuk bëhet për një shqiptar. Për këto arsye, ne gazetarët bëjmë këtë apel-protestë si shenjë humanizmi për të mbrojtur jetën e një njeriu, të një 15 vjeçari që e ka emrin shqiptar.

Ftojmë të gjithë të interesuarit të shprehin mirëkuptimin ndaj këtij minoreni që sot vuan jo për faj të tij. Ai pret ndoshta edhe ndihmën e zotit, dhe të secilit prej nesh.

Gazetarët nënshkrues:

Hyqmet Zane                            TV Dardan, "RD"

Besim Dybeli                            Koha Jonë

Gentiana Skura                         Top Albania Radio, Gazeta Shqiptare

Fatmir Musai

Fatos Salliu                               TV Klan

Denada Shkodrani                      ATSH/ Radio +2

Shpëtim Hala                            TV Dardan, Elbasan

Soni Kurani                               "Shekulli"/ TV Skampa

Emin Kociu                               TNSH/ "Gazeta Shqiptare"

Pëllumb Zekthi                          "Republika"

Florenc Valva

Aleko Likaj                               "Koha Jonë"

Vladimir Mema                         TV Arbëria

Gazmend Janku                         ETV

Sulejman Haxhihasani                  TVSH

Tamar Jalldoshi                         Gazeta "Elbasani"