LIRIA E MEDIAS DHE MINORITETET NË GREQI

Deklaratë për shtyp e mbërritur në adresë të KSHH nga:

• Vëzhguesi grek i Helsinkit

• Shtëpia e Kulturës Maqedone

• Rainbow-Organizata e Minoritetit Maqedon në Greqi

• Grupi i të Drejtave të minoriteteve-Greqi.

 Organizatat tona mbështesin rekomandimet për më shumë liri të lëvizjeve në Ballkan…

Megjithatë, ato mendojnë se Konferenca, gjatë së cilës këto rekomandime u përpunuan (Konferencë e mbajtur në Selanik), për fat të keq është një shembull negativ. Për të trajtuar temën “Kufijtë dhe minoritetet në Ballkan” ndër ata që morën fjalën ishin kryetarë të partive minoritare – dhe partnerë në koalicion qeveritar – në Shqipëri (Partia greke), në Bullgari (turke), në Kosovë (serbe) dhe Maqedoni (partitë shqiptare), por nuk pati përfaqësues nga Greqia – vendi ku u mbajt konferenca – madje nuk pati asnjë përfaqësues nga të dy deputetët e minoritetit turk. U vu re po ashtu mungesa e përfaqësuesve të minoritetit më të madh e më të persekutuar siç janë romët. Për më tepër, aty u përfaqësuan organizata të të drejtave të njeriut nga Bullgaria, Maqedonia dhe Turqia, kurse organizata homologe greke nuk u ftuan. Në vend të tyre morën pjesë autorë botimesh të njohura për qëndrimet e tyre kundër minoriteteve. Në fakt, organizatat tona dëgjuan për konferencën pas mbarimit të saj, nga lajmet e shtypit.

Ky nuk është një rast i veçuar; ai është  tipik për mbledhjet që mbahen në Greqi për këtë temë nga institucione shtetërore, media ose OJQ-të të afërta me shtetin, duke përfshirë këtu, me përjashtim të një rasti, mbledhje të organizuara bashkërisht me Këshillin e Evropës. Vetë minoritetet dhe OJQ-të që merren me të drejtat e minoriteteve si rregull nuk ftohen as të marrin pjesë, pa le të marrin fjalën në to. Nuk ka lidhje të tjera as diskutime midis minoriteteve dhe autoriteteve. Në të kundërtën, meqenëse politika zyrtare greke është se Greqia nuk ka minoritete kombëtare, ata që kanë mendim të kundërt janë të veçuar dhe në ndonjë rast edhe sulmohen ose edhe shpifet kundër tyre. Në të njëjtën kohë të gjitha mediat greke i përmendin këto minoritete në raste të rralla, gjithmonë duke i atakuar.

Mund të thuhet se një pjesëmarrje ndërkombëtare në mbledhje të tilla vetëm ndihmon për ta vazhduar dhe për ta përligjur një qëndrim të tillë. Në shpresojmë se në të ardhmen nënshkruesit për më shumë lëvizje në Ballkan (Vjenë 17 tetor 2004) do t’i referohen posaçërisht çështjes së minoriteteve dhe do të ndihmojnë që në Greqi të ndryshojë gjendja e intolerancës kundrejt minoritetve.