NJË SHTETAS SHQIPTAR, VIKTIMË E PARAGJYKIMEVE

RACISTE NË GREQI

(Denoncim i Amnesty International)

Mirditori 28 vjeçar Zef Gjoni nga qyteti i Rrëshenit, mbas 8 vjet pune në Greqi, krejt pa pritur, si rezultat i një padie të rreme që i bëri ish bashkëshortja greke, për motive thjesht hakmarrëse, bie preh edhe i sjelljeve raciste.

Gjykata e Lartë greke, pasi shqyrtoi ankesën e 28- vjeçarit, vërtetoi se gjatë periudhës që është mbajtur në izolim si i paraburgosur, mbi shtetasin shqiptar Zef Gjonaj është ushtruar dhunë fizike dhe psikologjike, e shoqëruar herë pas here edhe me sjellje raciste. Por Gjykata e Selanikut megjithëse i dha pafajësinë për akuzën e ngritur ndaj tij, nuk e dëmshpërbleu materialisht për kohën e qëndrimit si i paraburgosur.

Historia

Ndërsa familja Gjonaj me 7 anëtarë la Rrëshenin për t'u vendosur në Tiranë, djali i vogël i familjes Zefi, megjithëse nuk i kishte mbushur ende 19 vjeç, mori në këmbë rrugën e emigracionit. "Ishte maji i vitit 1992, kur bashkë me 3 shokë nga Rrësheni dhe 2 kushërinj nga Rubiku vendosëm të ikim në Greqi. Me vete mora vetëm 10 mijë lekë të vjetra, të cilat më mjaftuan deri sa mbërrita në Kapshticë"- tregon Zefi fillimin e aventurës së tij, e cila sigurisht që nuk përfundoi këtu. Më pas vijojnë peripecitë për të filluar një punë dhe për të gjetur një strehë. Me rrëfimin e tij Zefi tregon edhe për dashurinë që lindi në Selanik me greken Anastasi. Ndërkohë që në Shqipëri, viti 1997 ishte e mbrapshtë, për Zefin dashuria e tij në muajin Mars kurorëzohet me martesë. "Meqë unë nuk hoqa dorë nga religjioni im katolik, ku m'u kërkua të konvertohesha në ortodoks, celebrimin e bëmë vetëm në një zyrë të gjendjes civile, duke shmangur kurorëzimin në kishën greke" thotë Zefi, i cili rrëfimin e tij e vazhdon me zënkat që filluan mbas dy vjetësh martese. Mosmarrëveshjet në familje kishin mbërritur në një gjendje kritike, kështu Zefi kërkoi t'i  jepej fund kësaj gjendjeje dhe i pari kërkoi shkurorëzimin. Vetëm një javë mbas divorcit Zefi vjen në Shqipëri për punë. Kur kthehet në Greqi policia greke e vendos në pranga. Ish-bashkëshortja kishte bërë kallëzimin në policinë greke. Zefi akuzohej për veprën ordinere të grabitjes.

Akuza e rreme

"Kjo akuzë e rreme më bëri që unë të vuaja dy muaj në qelitë e policisë së Selanikut. Në qeli fyesha me akuza nga më të ndryshmet dhe sharje nga më banalet. Më lidhnin në këto qeli dhe më tundonin duke më lënë në tokë ushqime të shijshme dhe cigare, të cilat nuk mund t'i  merrja, rrëfen Zefi. Gjatë kohës që punova në Greqi i kisha mundësitë financiare për të bërë ankesat në nivelet e tjera të Gjykatës Greke. Me ndihmën e paçmueshme të avokatit të njohur grek Stefanopulos, Gjykata e Lartë në Athinë pasi vërteton ankesën e 28 vjeçarit, vendos zhdëmtimin prej 13 milion dhrahmish.

Përfundimi

Vetëm tre ditë më parë Zef Gjonaj kthehet nga Greqia. Në doganën e Kapshticës kryen veprimet për zhdoganimin e një sërë sendesh që kishte sjellë nga toka helene. Zefi ka vendosur që jetën e tij ta vazhdojë pranë familjes në kryeqytet. "Me kapitalin që fitova me punë edhe me dëmshpërblimin e Gjykatës Greke, si dhe me ndihmën e dy vëllezërve më të mëdhenj do të filloj një aktivitet tregtar ose investim në Tiranë. Edhe këtu tashmë mund të fitosh" - përfundon rrëfimin Zef Gjonaj.