Më shumë tolerancë dhe respekt ndaj njëri - tjetrit

  21 Marsi është Dita Ndërkombëtare kundër Racizimit dhe Diskriminimit Racial. Në kuadër të kësaj dite, Komiteti Shqiptar i Helsinkit, si organizata e mbrojtjes së të drejtave të njeriut dhe sensibilizimit  të publikut përshëndet:

• Frymën e tolerancës dhe mirëkuptimit ndërmjet shtetasve që i përkasin grupeve të ndryshme sociale, etnike, kombëtare si dhe besimeve të ndryshme fetare.

• Zhvillimet pozitive të legjislacionit shqiptar në drejtim të mbrojtjes së lirive dhe të drejtave të njeriut në përgjithësi dhe të minoriteve dhe grupeve më të riskuara në veçanti.

• Reformën ligjore në drejtim të parandalimit të diskriminimit racial dhe formave të tjera të diskriminimit.

• Reformën institucionale të ndërmarrë dhe miratimin e strategjisë kombëtare “Për përmirësimin e kushteve të jetesës së komunitetit rom në Shqipëri”.

• Frymën e tolerancës së treguar në median shqiptare.

• Përpjekjet që bëhen për të përmirësuar frymën e mirëkuptimit dhe respektimit reciprok të të drejtave të shtetasve të huaj në Shqipëri dhe të shtetasve shqiptar në vendet fqinje.

Por me gjithë progresin e bërë gjatë këtyre viteve, Komiteti Shqiptar i Helsinkit shpreh mendimin e vet se:  

• Situata ekonomike dhe sociale e disa grupeve te veçanta në shoqërinë shqiptare  dhe sidomos i komunitetit rom dhe  egjyptian vazhdon të jetë e vështirë.

• Pjesëmarrja e përfaqësuesve të këtyre komunitete në zbatimin e strategjive të ndryshme është relativisht e ulët;

• Arsimimi i fëmijëve të këtyre grupeve sociale, formimi profesional dhe punësimi i popullsisë rome dhe egjyptiane nuk është i kënaqshëm;

• Pjesëmarrje e tyre në jetën publike gjithashtu është e pakët;

Në kuadër të kësaj date, KSHH-ja sjell në vëmendje të publikut dhe të institucioneve shtetërore faktin se Komisioni Europian kundër Racizimit dhe Intolerancës (ECRI) është i shqetësuar lidhur me paragjykimet dhe steriotipet për kategori të veçanta të shoqërisë në shumë vende të Europës si romët/jevgjit,

azilkërkuesit dhe emigrantët, ndaj të cilëve vërehen shfaqje të ksenofobisë  dhe të racizimit.

Komiteti Shqiptar i Helsinkit kërkon që:

• Qeveria shqiptare të krijojë kushte më të mira për përfaqësuesit e minoritet rom dhe komunitetit egjyptian jo vetëm për një pjesëmarrje aktive në hartimin e strategjive për përmirësimin e kushteve të tyre në shoqëri, por edhe në drejtim të marrjes së masave konkrete për zbatimin e strategjive përkatëse. 

• Strategjia kombëtare për përmirësimin e kushteve të jetesës së romëve të shoqërohet me planifikimin e buxheve të nevojshme dhe të mjaftueshme për zbatimin e saj.

• Duke qënë se viti 2005, është viti europian i qytetarisë nëpërmjet edukimit qeveria shqiptare dhe strukturat përgjegjëse të rrisin përpjekjet lidhur me arsimimin e fëmijëve në përgjithësi, por atyre rom dhe egjyptian në veçanti.

• Qeveria Shqiptare të vazhdojë të punojë për respektimin dhe mbrojtjen më të mirë të interesave të emigrantëve shqiptarë në vendet ku ata jetojnë dhe punojnë.

• Legjislacioni shqiptar të vazhdojë të plotësohet dhe të përmirësohet me qëllim që të parandalojë dhe të dënojë çdo lloj diskriminimi direkt ose indirekt që mund t’u bëhet personave të veçantë.

Komiteti Shqiptar i Hesinkit është i mendimit se partitë politike mund të luajnë një rol të rëndësishëm në këtë drejtim. Në hartimin e programave të tyre, ata të përfshijnë edhe çështje që kanë të bëjnë me mbrojtjen e të drejtave të grupeve më të riskuara nga diskriminimi i drejtëpërdrejtë ose i fshehtë.