KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

KONFERENCA KOMBETARE: 

“Ekzekutimi i vendimeve gjyqësore të formës së prerë 

në mbrojtje të të drejtave të individëve”

Organizuar nga Avokati i Popullit në bashkëpunim me Komitetin Shqiptar të Helsinkit

04.02.2004  

Duke vlerësuar rëndësinë që ka respektimi i të drejtave të njeriut dhe ndikimit të sistemit të drejtësisë në këtë drejtim, në datën 19 Dhjetor 2003, Institucioni i Avokatit të Popullit, në bashkëpunim me Komitetin Shqiptar të Helsinkit zhvilluan Konferencën Kombëtare “Ekzekutimi i vendimeve gjyqësore të formës së prerë në mbrojtje të të drejtave të individëve”. Në këtë Konferencë morën pjesë përfaqësues të Qeverisë Shqiptare, të Ministrisë së Drejtësisë, të Prokurorisë së Përgjithshme dhe të prokurorive të rretheve, të Ministrisë së Rendit Publik, të Ministrisë së Financave, të Avokaturës së Shtetit, drejtues të Shërbimit Përmbarimor, drejtues të prokurorisë, gjykatave të rretheve dhe të administratës publike, si dhe përmbaruesit gjyqësorë.

Qëllimi i Konferencës ishte diskutimi i problemeve që ndeshen në praktikat e ekzekutimit të vendimeve gjyqësore dhe nevoja e përmirësimit të praktikës ekzistuese me qëllim respektimin dhe mbrojtjen e të drejtave të shtetasve.

Zyra e Avokatit të Popullit dhe Komiteti Shqiptar i Helsinkit vendosën të bëjnë objekt të kësaj Konference problemet që ndeshen në procesin e ekzekutimit të vendimeve gjyqësore, nevojën urgjente për zgjidhjen e tyre duke patur parasysh aksiomën se drejtësia e vonuar është drejtësi e mohuar. Komiteti Shqiptar i Helsinkit kishte edhe një arsye më shumë për të kontribuar në këtë fushë, pasi këtë vit problemi i ekzekutimit të vendimeve penale dhe respektimi i të drejtave të shtetasve në sistemin e drejtësisë, lufta kundër korrupsionit në drejtësi, kanë qenë një prioritet i veprimtarisë së Komitetit në kuadër të nismave të ndërmarra nga koalicioni antikorrupsion, anëtar i të cilit është edhe KSHH. Në këtë fushë KSHH ka realizuar një sërë vëzhgimesh  dhe një studim të detajuar të legjislacionit shqiptar të cilat do të botohen së shpejti.

Konferenca i zhvilloi punimet në një seancë plenare dhe dy panele, “Ekzekutimi i vendimeve gjyqësore civile të formës së prerë dhe problematika e hasur në këtë proces” dhe paneli tjetër “Ekzekutimi i vendimeve gjyqësore penale të formës së prerë”.

Në kuadër të kësaj Konference u ndërmor një studim për të njohur pikërisht problemet që mbart ky shërbim. Studimi u krye në 9 rrethe të vendit[1][1] dhe për këtë u intervistuan 445 persona. Personat e intervistuar ishin shtetas të cilët kishin kontakte me zyrat e përmbarimit për shkak të çështjeve të mbartura nga vitet e mëparshme ose atyre të ardhura për ekzekutim gjatë vitit 2003.[2][2]

Përfaqësues të Komitetit Shqiptar të Helsinkit paraqitën përfundimet e një monitorimi të bërë lidhur me aksesin e publikut në Zyrën e Përmbarimit, vlerësimin e publikut për punën e këtyre zyrave. Disa nga përfundimet kryesore të këtij vëzhgimi ishin:

Ø       Përgjithësisht, mendimi i shtetasve për mënyrën e funksionimit të zyrës së përmbarimit ishte jo i mirë.

Ø       Ka një mungesë të theksuar të trasnparencës dhe informimit të publikut për ecurinë e procesit të ekzekutimit të një vendimi. Jo e vogël është mosnjohja nga personat që janë në kontakt me zyrat e përmbarimit, mbi procedurat dhe rregullat e ekzekutimit të vendimeve gjyqësore.

Ø       Fenomeni i korrupsionit është i pranishëm në veprimtarinë e administratës publike dhe organeve të drejtësisë.

Ø       Ekzekutimi i vendimeve gjyqësore ka patur zvarritje të shumta, ose deri edhe mosekzekutime te tyre, gjë që ka cënuar rëndë të drejtat e shtetasve.

Ø       Përmbushja e detyrave dhe etika profesionale e punonjësve të këtij sistemi është një element shumë i rëndësishëm në mirëfunksionin i sistemit të drejtësisë. Etika duhet të karakterizojë çdo punonjës të administratës publike.  Një ndër treguesit e vlerësimit të këtij raporti është edhe mënyra e trajtimit të ankesave dhe informimi i shtetasve. Pjesa më e madhe e personave të ankuar kanë patur ankesa në lidhje me mënyrën e trajtimit të ankesave të tyre.

Nisur nga problematika e trajtuar në këtë Konferencë, së shpejti, zyra e Avokatit të Popullit dhe Komiteti Shqiptar i Helsinkit do të botojnë rekomandimet e dala nga kjo Konferencë.

Në panelin “Ekzekutimi i vendimeve gjyqësore penale të formës së prerë”, KSHH paraqiti disa përfundime të studimit të kryer pranë Prokurorisë së Tiranës dhe Durrësit lidhur me respektimin e të drejtave të të dënuarve gjatë fazës së ekzekutimit të vedimeve penale.

Ky studim u krye në kuadër të nismës së koalicionit antikorrupsion, me mbështetjen financiare të MSI (Management Systems International), me mbështetjen e Agjencisë së Shteteve të Bashkuara për Zhvillim Ndërkombëtar (USAID).

Problematika e shtruar për diskutim, rekomandimet konkrete të dala nga kjo Konferencë ishin një premisë e mirë për përmirësimin e punës së shërbimit përmbarimor dhe sistemit gjyqësor në të gjithë vendin.