KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Letër e hapur     

Shqetësim , çështja e gjuhës së urrejtjes, e fyerjeve nga më të rëndomtat, e akuzave nga më monstruozet që përdoren në seancat parlamentare

Drejtuar:         Z. Servet Pëllumbi

                        Kryetar i Kuvendit të Shqipërisë

                        Z. Teodor Laço

                        Kryetar i Grupit Parlamentar Liberal Demokrat

                        Z. Uran Metko

                        Kryetar i Grupit Parlamentar i Ballit Kombëtar

                        Z. Preç Zogaj

                        Kryetar i Grupit Parlamentar Aleanca për Demokraci

                        Z. Fatmir Mediu

                        Kryetar i Grupit Parlamentar i Partisë Republikane

                        Z. Eqerem Spahiu

                        Kryetar i Grupit Parlamentar i Lëvizjes së Legalitetit

                        Z. Ndue Preka

                        Kryetar i Grupit Parlamentar “Të Gjelbërit”

                        Z. Ligoraq Karamelo

                        Kryetar i Grupit Parlamentar të Qendrës Liberal Demokrate

                        Z. Gaqo Apostoli

                        Kryetar i Grupit Parlamentar të Partisë Socialdemokrate

                        Z. Nard Ndoka

                        Kryetar i Grupit Parlamentar të Partisë Demokrate

                        Z. Bamir Topi

                        Kryetar i Grupit Parlamentar të Partisë Demokratike

                        Z. Gramoz Ruçi

Kryetar i Grupit Parlamentar të Partisë Socialiste

Tiranë, më 17 Maj 2004

Kjo është hera e dytë që organizatat tona ju drejtohen Juve Zoti Kryetar i Kuvendit dhe juve zotërinj deputetë, kryetarë të grupeve parlamenatre për një problem që vazhdon të jetë shqetësues. Është çështja e gjuhës së urrejtjes, e fyerjeve nga më të rëndomtat, e akuzave nga më monstruozet që përdoren në seancat parlamentare. Në këto kushte nuk mund të flitet jo më për respektimin e parimit të prezumimit të pafajësisë, por as për etikën më elementare.

Të nderuar deputetë:

Pluralizmi demokratik që gjen shprehjen edhe në zhvillimin e seancave parlamentare nënkupton luftën luajale dhe konstruktive, shpalosjen e alternativave që synojnë thellimin e proceseve demokratike dhe integrimin e vendit tonë në familjen Evropiane. Në jemi të ndërgjegjshëm se debati parlamentar në disa raste mund të shoqërohet edhe me ndonjë nervozizëm apo mungesë vetpërmbajtjeje, por jo deri  në atë masë sa ta ndjejnë vehten të fyer dhe ata që ju dëgjojnë, sa të mos flasin mirë për ju edhe fëmijët ndaj të cilëve ju, dhe ne të gjithë kemi detyrime të shumta në radhë të parë për edukimin e tyre. Brezi i ri pret gjithashtu më tepër nga Ju, përfaqësuesit e popullit. Atij duhet t’i rritet besimi për nje të ardhme më të mire demokratike.

Në një vend demokratik është i njohur si roli i pozitës, edhe ai i opozitës, por të dyja këto forca konsiderohen kundërshtarë politikë dhe jo grupime armiqësore. Akuzat e ndërsjella që ju përdorni janë aq të mëdha përsa i përket rrezikshmërisë shoqërore dhe aq të shumta në shtrirjen e tyre, saqë njerëzit e thjeshtë që ndjekin transmetimin e senacave parlamentare, e kanë të vështirë të dallojnë dhe të besojnë kush është i ndershmi dhe kush i korruptuari, kush është i pafajshmi dhe kush është krimineli.

Me keqardhje ju vëmë në dijeni se në takimet tona me shtetas të shtresave të ndryshme, pavarësisht nga bindjet e tyre, simpatitë përkatësitë e tyre partiake, kanë shprehur dëshpërimin dhe indinjatën e tyre për gjuhën që përdoret në Kuvend, për sjelljet e pahijshme të mjaft deputetëve.

Me të drejtë Kuvendi cilësohet si tempull i demokracisë dhe i parlamentarizmit. Kështu do të dëshironim të ishte edhe në praktikë, ndërsa ato që shikojmë dhe dëgjojmë na bindin se jemi ende larg këtij objektivi. Detyrat e përfaqësuesi të popullit siç dihet, është që me qëndrimet dhe sjelljet e tij, kudo, por në mënyrë të veçantë në organin më të lartë legjislativ të ndikojnë pozitivisht në edukimin e njerëzve, me respekt për rregullin, ligjin dhe institucionet. E vërteta, edhe pse e hidhur, është se kjo nuk po ndodh.

Para disa kohësh u diskutua për nevojën e miratimit të një ligji lidhur me etikën parlamentare. Ne e përshëndetëm këtë nismë dhe do të dëshironim që miratimi i tij të ndikonte në zhvillimin e ekuilibruar dhe të kulturuar të seancave parlamentare, megjithëse nuk besojmë që shkaku i kësaj gjendjeje të jetë mungesa e ligjit.

Ne jemi dëshmitarë se në zgjedhjet e fundit numri i pjesëmarrësve në votime ishte relativisht i vogël. Ky është një tregues që kërkon reflektim në radhë të parë nga klasa jonë politike. E vërteta është se ka lëkundje në besimin e njerëzve ndaj Jush. Këtë situatë po e rëndon edhe më tepër atmosfera e acaruar parlamentare, gjuha e turpshme që përdoret, si dhe mospërfillja e opinionit të gjerë shoqëror që nuk pajtohet me këtë gjendje.

Në deklarata dhe konferenca shtypi flitet shpesh për nevojën e rritjes së imazhit të Shqipërisë. Por seancat tuaja parlamentare tejet të politizuara, si dhe mungesa e vullnetit politik për të dialoguar nuk i shërbejnë rritjes së këtij imazhi, përkundrazi e cënojnë atë.

Në përfundim do të dëshironim që përmbajtja e kësaj letre të konsiderohej si një shqetësim i shoqërisë civile që është direkt e interesuar për një proces aktiv dhe të kulturuar parlamentar, për dialog midis forcave politike, gjë që do të kontribuonte në stabilitetin e vendit, zgjidhjen e drejtë dhe të shpejtë të problemeve që na preokupojnë, si dhe përballimin e sfidave drejt integrimit Evropian.

Populli vëzhgon. Elektorati mban shënim dhe reagon me votën e tij. Ju jeni në provë. Do të ishte mirë që shqetësimi i organizatave tona dhe i shumë të tjerëve, të vlerësohej me seriozitetin e duhur.

Organizatat jo-fitimprurëse hartuese të kësaj letre të hapur:

Komiteti Shqiptar i Helsinkit

Grupi Shqiptar i të Drejtave të Njeriut

Qendra Shqiptare për të Drejtat e Njeriut

Shoqata për Kulturë Demokratike

Shoqata e Konstitucionalistëve Shqiptarë

Qendra për Studimet Parlamentare

Drejtuar:           Z. Servet Përllumbi

                        Kryetar i Kuvendit të Shqipërisë

                        Z. Teodor Laço

                        Kryetar i Grupit Parlamentar Liberal Demokrat

                        Z. Uran Metko

                        Kryetar i Grupit Parlamentar i Ballit Kombëtar

                        Z. Preç Zogaj

                        Kryetar i Grupit Parlamentar Aleanca për Demokraci

                        Z. Fatmir Mediu

                        Kryetar i Grupit Parlamentar i Partisë Republikane

                        Z. Eqerem Spahiu

                        Kryetar i Grupit Parlamentar i Lëvizjes së Legalitetit

                        Z. Ndue Preka

                        Kryetar i Grupit Parlamentar “Të Gjelbërit”

                        Z. Ligoraq Karamelo

                        Kryetar i Grupit Parlamentar të Qendrës Liberal Demokrate

                        Z. Gaqo Apostoli

                        Kryetar i Grupit Parlamentar të Partisë Socialdemokrate

                        Z. Nard Ndoka

                        Kryetar i Grupit Parlamentar të Partisë Demokrate

                        Z. Bamir Topi

                        Kryetar i Grupit Parlamentar të Partisë Demokratike

                        Z. Gramoz Ruçi

                        Kryetar i Grupit Parlamentar të Partisë Socialiste