KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

LETËR E HAPUR

Atmosfera në Kuvend është e acaruar në mënyrë të skajshme. Parlamenti në disa raste është kthyer në një arenë fyerjesh, sulmesh dhe akuzash nga më të rëndat

Tiranë, më 13 Shkurt 2004

Zotërinj deputetë,

Fillimisht shprehim respektin tonë për Kuvendin e Shqipërisë, organin më të lartë legjislativ si dhe për përfaqësuesit e popullit në këtë organ.

      Kuvendi i Shqipërisë në këto 13 vjet ka miratuar mjaft ligje të rëndësishme si dhe Ligjin Themeltar, Kushtetutën e Republikës së Shqipërisë. Ai ka ratifikuar gjithashtu edhe shumë dokumenta të rëndësishme ndërkombëtare.

       Si përfaqësues të një pjese të shoqërisë civile ndjekim me vëmendje veprimtarinë e Kuvendit në përgjithësi dhe punimet plenare të tij në veçanti.

       Kemi parasysh se një Kuvend pluralist, ku populli ushtron sovranitetin nëpërmjet përfaqësuesve te tij, fryma e debatit dhe shprehja e lirë e mendimeve janë tregues të atij emancipimi demokratik, ku si pozita edhe opozita luajnë rolin e tyre të rëndësishëm dhe të pazëvendësueshëm në thellimin e mëtejshëm të proceseve demokratike.

       Por me keqardhje konstatojmë se, veçanërisht këto muajt e fundit, atmosfera në Kuvend është e acaruar në mënyrë të skajshme. Parlamenti në disa raste është kthyer në një arenë fyerjesh, sulmesh dhe akuzash nga më të rëndat. Nga tribuna e këtij tempulli të shenjtë legjislativ disa deputetë nëpërmjet diskutimeve pasionante dhe të elektrizuara e vënë veten në rolin e hetuesit, prokurorit apo gjyqtarit duke injoruar në mënyrë flagrante parimet e njohura dhe të sanksionuara edhe në Kushtetutën tone: ndarjen e pushteteve dhe prezumimin e pafajësisë.

       Zgjedhësit presin nga përfaqësuesit e tyre që të zgjidhin problemet që preokupojnë vendin, duke kontribuar kështu në konsolidimin e institucioneve demokratike, fuqizimin e ekonomisë, garantimin e qetësisë në vënd, miratimin e ligjeve për një goditje më të ashpër të veprimtarisë kriminale  dhe parandalimin e saj etj.

       Opinioni i gjerë shoqëror kërkon nga deputetët e pozitës dhe opozitës në parlament që për çështje jetike në interes të vendit dhe të popullit të arrijnë mirëkuptimin dhe konsensusin duke kontribuar kështu, në integrimin më të shpejtë të Shqipërisë në familjen e madhe Europiane.

       Në këtë letër, me keqardhje detyrohemi të evidentojmë shqetësimin që, nuk është vetëm i organizatave tona, por i mbarë shoqërisë, se etika dhe kultura parlamentare lënë mjaft për të dëshiruar.

       Të gjitha këto nuk ka si të mos krijojnë një shije të hidhur aq sa nga goja e shumë qytetarëve dëgjohen shprehjet: “transmetime të tilla të punimeve parlamentare nuk ia vlen të ndiqen “. Publiku i gjerë kërkon nga përfaqësuesit e tij zbatimin e normave të korrektesës kushtetuese. Njerëzit e thjeshtë që ndjekin punimet e parlamentit zhgënjehen kur deputetët, në vend të debatit të mirëfilltë, e personalizojnë atë duke synuar denigrimin e mendimit të kundërt, edhe kur ai mund të jetë racional. Një shenjë tjetër e zhgënjimit të qytetarëve është rënia e pjesëmarrjes së elektoratit, që u vu re sidomos në zgjedhjet e fundit lokale.

       Zhvillimi normal i seancës parlamentare nënkupton respektimin e rregullores së brendshme të Kuvendit. Diskutimet, debati, ndërhyrjet apo replikat nuk janë qëllim në vetvete dhe as mjete për të zvarritur zgjidhjet e çështjeve aktuale dhe të ngutshme. Kontrolli parlamentar është i një rëndësie të veçantë. Në këtë drejtim maxhoranca  duhet të krijojë për opozitën hapësirat e nevojshme, gjë që kërkon vlerësim për rolin dhe kërkesat e saj të ligjshme.

       Ju të respektuar deputetë dhe liderë të partive politike, kohët e fundit keni shprehur interes për rolin e shoqërisë civile, madje siç keni deklaruar, keni përgatitur ose jeni duke përgatitur edhe programe bashkëpunimi me rrethet akademike dhe intelektuale. Nuk ka dyshim se kjo nismë vlerësuese duhet përshëndetur. Por si mund të realizohen programe të tilla në një situatë konfliktuale dhe të tensionuar politike ku kundërshtarët politikë etiketohen si armiq ?!

       Gjuha e urrejtjes dhe mungesa e etikës parlamentare nuk mund të mos lenë mbresa negative edhe në gjirin e shoqërisë civile që, siç dihet mund dhe duhet të luaj një rol të rëndësishëm në fushën e mbrojtjes së lirive dhe të drejtave të shtetasve, në zhvillimin e debatit konstruktiv dhe sensibilizimin e opinionit shoqëror.

       Ne jemi të ndërgjegjshëm se diskutimet dhe debatet në Kuvend nuk mund të shkojnë si në vaj. Ne e kuptojmë gjithashtu se në luftën politike, në momente të caktuara mund të ketë edhe ndonjë acarim, por mbi pasionin dhe interesat e ngushta partiake duhet të sundojë logjika dhe argumenti, zgjidhja e çështjeve në frymën e Kushtetutës dhe të legjislacionit në fuqi. E theksojmë këtë, edhe për faktin se atmosfera konfliktuale në Kuvend reflektohet në shoqëri, cënon imazhin e vendit dhe lëkund besimin e popullit ndaj përfaqësuesve të zgjedhur.

       Nëpërmjet kësaj letre ndjejmë detyrën qytetare t’u bëjmë thirrje të gjithë deputetëve,  të të gjithë spektrit politik, që në interes të vendit dhe në shërbim të elektoratit që ata përfaqësojnë, ta kthejnë parlamentin në një tribunë të vërtetë pluraliste dhe demokratike në një organ që të ushtrojë të gjitha funksionet e përcaktuara në Kushtetutë.

Organizatat jo-fitimprurëse hartuese të kësaj letre të hapur:

Komiteti Shqiptar i Helsinkit

Grupi Shqiptar i të Drejtave të Njeriut

Qendra Shqiptare për të Drejtat e Njeriut

Shoqata për Kulturë Demokratike

Forumi i Pavarur i Gruas Shqiptare

Shoqata e Konstitucionalistëve Shqiptarë

Qendra për Studimet Parlamentare