|
Tryezë
e rrumbullakët Prezumimi i pafajësisë dhe roli i
medias
Tiranë më 15 mars 2006
Në datën 15 mars 2006, Komiteti Shqiptar i Helsinkit
në bashkëpunim me Forumin e Mendimit të Lirë dhe
Qendrën e Studimeve Parlamentare organizoi tryezën e
rrumbullakët Prezumimi i pafajësisë dhe roli i
medias.
Nëpërmjet kësaj tryeze u synua të tërhiqej vëmendja
e medias dhe aktorëve të tjerë publikë për rëndësinë
që paraqet respektimi i parimit kushtetues i
prezumimit të pafajësisë për ruajtjen e dinjitetit
njerëzor dhe të drejtave të njeriut në përgjithësi.
Të pranishëm në këtë tryezë ishin përfaqësues të
ndryshëm të mediave, të institucioneve shtetërore,
të shoqërisë civile, gazetarë, juristë, etj.
Nga diskutimet e pjesëmarrësve në tryezë u vu në pah
rëndësia e veçantë e parimit të prezumimit të
pafajësisë dhe konceptimi më i drejtë i këtij parimi
nga përfaqësuesit e medias. Gjithashtu, u diskutua
për pasojat negative në rast të cënimit të këtij
parimi.
Organizimi i kësaj tryeze synon sensibilizimin e
përfaqësueve të medias lidhur me mbrojtjen e
reputacionit dhe dinjitetit të njeriut në procesin e
rëndësishëm të dhënies së informacionit.
Respektimi i parimit të prezumimit të pafajësisë nuk
pengon dhënien e lajmit, por vetëm kërkon
përmirësimin e gjuhës së përdorur. Në këtë kuadër
është e nevojshme që të përdoret një gjuhë korrekte
e cila të mos cënojë lajmin si dhe të drejtat
themelore që Kushtetuta ju njeh shtetasve të tij.
Nga të gjithë diskutantët u ngrit problemi i gjuhës
së përdorur nga zyrtarë të administratës publike dhe
kryesisht nga zyrtarët dhe funksionarët e shtetit,
ku parimi i prezumimit të pafajësisë shkelet në
mënyrë flagrante, pavarësisht se deri më sot
numërohen raste të rralla të hapjes së dosjeve
penale në përgjigje të akuzave gojore që politikanët
i bëjnë njeri -tjetrit
Me këtë rast, tryeza e rrumbullakët sugjeron që neni
30 i Kushtetutës së RSH-së për prezumimin e
pafajësisë të trajtohet edhe në qarqet e
parlamentarëve dhe funksionarëve zyrtarë.
Në diskutimet e bëra në këtë tryezë u evidentuan dhe
vendimet e Gjykatës Europiane të të drejtave të
njeriut dhe ato të Gjykatës Kushtetuese lidhur me
rëndësinë e këtij parimi.
Kjo tryezë është vetëm fillimi i një procesi të
gjatë për reformimin e dhënies së informacionit
publikut në përputhje me parimet dhe të drejtat
kushtetuese.
|
