KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Më tepër tolerancë nga politikanët dhe funksionarët e lartë të shtetit
 

19.05.2004  

Sipas njoftimeve të shtypit, Kryeministri i Republikës së Shqipërisë Z. Fatos Nano ka denoncuar për ndjekje penale botuesin e gazetës “Koha Jonë”, Z. Nikolla Lesi, dhe në të njëjtën kohë e ka paditur atë civilisht në gjykatën e rrethit.

Komiteti Shqiptar i Helsinkit nuk ka të drejtë të vlerësojë bazueshmërinë ose jo të kërkesave të Kryeministrit dhe as të rekomandojë mënyrën e zgjidhjes së tyre, sepse kjo është në kompetencën e organeve përkatëse. Megjithatë, konseguent në qëndrimet e tij, KSHH shpreh mendimet e mëposhtme:

Shtypi ka për detyrë të japë informacione mbi çështje nga më të ndryshme duke përfshirë edhe ato politike, si edhe çështje të interesit të përgjithshëm, ndërsa publiku ka të drejtë t’i marrë ato. Liria e shtypit është mjet i fuqishëm për të njohur dhe gjykuar sjelljet e funksionarëve të shtetit apo liderëve partiakë. Në këtë vështrim, hapësira e lirisë së autoriteteve kufizohet për shkak të interesit të shoqërisë demokratike për t’i dhënë mundësi shtypit të përmbushë rolin e rëndësishëm të observuesit publik.

KSHH nuk pajtohet as me shpifjet dhe as me fyerjet që mund të bëhen edhe nga gazetarë të veçantë. Gazetarët duhet të respektojnë etikën gazetareske dhe të drejtën e privatësisë. Megjithatë, politikanët dhe funksionarët e shtetit, në mënyrë të pashmangshme janë objekt i kontrollit dhe i kritikës së ashpër, i reagimit ndaj çdo fjale që thonë, ndaj çdo veprimi që ndërmarrin. Prandaj ata, siç është theksuar disa herë edhe në vendimet e Gjykatës Evropiane të të Drejtave të Njeriut, duhet të jenë më tolerantë, madje edhe ndaj teprimeve apo kritikave të diskutueshme. Por kjo s’do të thotë se ata janë të pambrojtur nga ligji, se ata nuk kanë të drejtë të ruajnë dinjitetin dhe reputacionin e tyre. Në këto raste shpesh rekomandohen mjetet e përgënjeshtrimeve, të deklaratave publike, të prononcimeve transparente, etj.

Ndryshe është me personat e thjeshtë që nuk i kanë këto funksione. Në këtë drejtim, gazetarët duhet të jenë të matur sepse para ligjit janë të barabartë.

KSHH mendon se dënimi i gazetarit mund të ishte i justifikueshëm në raste shumë të rralla, kur në mënyrë evidente vërtetohet se duke shpërdoruar profesionin e tij të nderuar si dhe misionin e tij tepër të rëndëishëm në mënyrë të qëllimshme ka cënuar dinjitetin dhe personalitetin e individit. Në të kundërtën, dënimi i tij do të ndikonte negativisht në lirinë e shtypit dhe të informacionit.

KSHH mendon gjithashtu se kritika e njerëzve të medias nga njëra anë dhe ndërgjegjësimi i autoriteteve publike nga ana tjetër, do t’i shërbenin arritjes së standarteve demokratike edhe në vendin tonë.