|
Me tepër tolerancë ndaj medias, më tepër
kujdes për heqjen e imunitetit
25.09.2004
Para disa kohësh, bashkëshortja e
Kryeministrit, zonja Xhoana Nano, i është drejtuar
gjykatës me kërkesën kundër deputetit z. Nikollë Lesi
për akuzën e fyerjes dhe shpifjes. Dje në datën 24
shtator 2004, Gjykata e Lartë arriti në përfundimin se
ekzistojnë kushtet ligjore për të kërkuar nga Kuvendi,
heqjen e imunitetit të z. Lesi për të mundësuar
shqyrtimin e plotë gjyqësor të pretendimeve të akuzueses.
Nuk është në kompetencën e Komitetit Shqiptar të
Helsinkit të vlerësojë bazueshmërinë ligjore të vendimit
të Gjykatës së Lartë. Megjithatë lidhur me shqyrtimin e
këtij vendimi nga Kuvendi, e shikojmë të nevojshme të
shprehemi si më poshtë:
KSHH mendon se në këtë rast, trajtimi i
këtij problemi nuk duhet shikuar vetëm nga ana
formalo-ligjore.
KSHH ka bindjen se Kuvendi do ta vlerësojë atë duke iu
referuar në radhë të parë parimit të tolerancës që duhet
të shfaqet nga personalitetet e larta shtetërore dhe
shoqërore në drejtim të medias edhe në ato raste kur ajo
e kalon masën, madje edhe kur e tepron atë ose nuk
tregon kujdesin e duhur për vërtetimin e fakteve dhe të
burimit të informacionit. Ky është qëndrimi konseguent
edhe i Gjykatës Evropiane të të Drejtave të Njeriut. Në
këtë drejtim KSHH është prononcuar publikisht edhe në
raste të tjera të kësaj natyre.
KSHH është i ndërgjegjshëm se akuza kundër z. Lesi është
ngritur jo nga kryeministri, por nga bashkëshortja e tij
që nuk hyn në radhën e personaliteteve. Megjithatë, KSHH
ka mendimin se përderisa akuzuesja ka një pozitë të
veçantë në shoqëri, çështja implikon indirekt edhe
kryeministrin e Shqipërisë.
Duke marrë parasysh sa më sipër KSHH i
bën thirrje Kuvendit që në dhënien ose jo të autorizimit
për ndjekje penale të z. Nikollë Lesi, që njihet jo
vetëm si botues por edhe si gazetar profesionist, të
tregojë objektivitet.
KSHH mendon se mosdhënia e autorizimit
nuk do ta dobësonte përgjegjësinë e medias së shkruar
dhe asaj elektronike ndaj publikut të gjerë dhe as do të
interpretohej si e drejtë për të cënuar dinjitetin e
njeriut apo intimitetit e jetës private.
Veç sa më sipër, KSHH i propozon Kuvendit ti përgjigjet
një problemi të shtruar prej kohësh: atij të miratimit
të ligjit për mdian jo për të penalizuar gazetarët por
për një mbrojtje më efektive të lirisë së shtypit. KSHH
mendon gjithashtu, se miratimi i këtij ligji do të
ndërgjegjësonte në një shkallë më të lartë funksionin
dhe kontributin e medias në një shoqëri demokratike,
përgjegjësinë e saj morale, si dhe etikën gazetareske.
|
