KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Të respektohet liria e medias dhe e informacionit

 26.08.2004

Në një letër drejtuar disa organizmave ndërkombëtare, institucioneve të vendit dhe OJF-ve shqiptare, redaksia e “NEWS 24” paraqiti gjendjen e vështirë në të cilën është vënë ky televizion për shkak të heqjes së akreditimit nga ana e Partisë Demokratike. Në të thuhet se prej dy muajsh gazetarëve të TV “NEWS 24”, u është ndaluar pjesëmarrja në konferencat e shtypit të PD-së. Ky fakt është konfirmuar edhe në Njoftimin për Shtyp të PD-së, dt. 20.08.2004 në të cilin përmenden shkaqet përse prej dy muajsh TV “NEWS 24” i është “hequr akreditimi” pranë kësaj partie.

Komiteti Shqiptar i Helsinkit, si një organizatë jo-qeveritare misioni i të cilit ka qenë dhe mbetet respektimi i lirive dhe të drejtave të shtetasve në të gjitha fushat, në frymën e parimeve që sanksionojnë lirinë e shtypit dhe të informacionit, me objektivitet dhe pa asnjë paragjykim, e shikon të nevojshme të deklarojë sa më poshtë:

1.  Pa u futur në vlerësimin dhe analizën e shkaqeve që sipas njoftimit për shtyp të PD-së kushtëzuan qëndrimin e kësaj të fundit ndaj TV “NEWS 24” dhe as në pretendimet që parashtrohen në letrën e TV “NEWS 24”, KSHH shpreh keqardhjen se në rastin konkret, në mënyrë evidente u dhunua e drejta e marrjes dhe dhënies së informacionit që garantohet nga neni 19 i Deklaratës Universale të të Drejtave të Njeriut, neni 10 i Konventës Evropiane të të Drejtave të Njeriut, nenet 22 dhe 23 të Kushtetutës të Republikës së Shqipërisë, etj. Moslejimi i medias së shkruar dhe asaj elektronike për të marrë informacion dhe si rrjedhim për t’ia transmetuar atë publikut të gjerë përfshirë këtu edhe aktivitetet e ndryshme shtetërore, politike dhe shoqërore, është i papranueshëm në një shoqëri demokratike dhe pluraliste. Qëndrime të tilla kanë në vetvehte elementë censurimi dhe diskriminimi.

2.                  Në dokumentat ndërkombëtare, në mjaft raste u është tërhequr vëmendja Qeverive të vendeve të caktuara që të respektojnë lirinë e shtypit, të mundësojnë dhënien e informacionit, të jenë transparentë dhe tolerantë ndaj gazetarëve. KSHH shpreh keqardhjen që në rastin e TV “NEWS 24”, parimi i së drejtës së marrjes dhe dhënies së informacionit u cënua nga partia më e madhe opozitare.  

3.                  KSHH me këtë rast e shikon të nevojshme të theksojë se praktika shumëvjeçare e Gjykatës Evropiane të të Drejtave të Njeriut tregon se sa e vëmendshme dhe e ndjeshme ka qenë kjo Gjykatë në çështjet me objekt cënimin e lirisë dhe informacionit, të sanksionuara nga neni 10 i Konventës Evropiane të të Drejtave të Njeriut. Do të mjaftonte të citonim vetëm dy vendime të dhëna nga kjo Gjykatë. Në njërin prej tyre thuhet se: “Liria e shprehjes është një nga shtyllat e shoqërisë demokratike. Ajo nuk mund  të përfshijë vetëm informacionet dhe opinionet e perceptuara pozitivisht ose të konsideruara si të padëmshme, por edhe ato që fyejnë, turbullojnë apo që janë shqetësim për shtetin ose për një grup të caktuar të shoqërisë. Të tilla janë kriteret e pluralizmit, të tolerancës dhe të hapjes, pa të cilat një shoqeri demokratike nuk mund të ekzistojë”.

Në vendimin tjetër të kësaj Gjykate thuhet se “liria e gazetarit përfshin edhe mundësinë për të përdorur në një shkallë të caktuar teprimin, madje edhe provokimin”.

Janë pikërisht arsyet e mësipërme dhe konkretisht respektimi i parimit të lirisë së shtypit dhe informacionit që KSHH-ja e shikon me vend t’u sugjerojë drejtuesve të Partisë Demokratike që të rishikojnë qëndrimin e tyre ndaj TV “NEWS 24” duke i kthyer asaj akreditimin, e për rrjedhojë edhe ky Televizion të trajtohet në kushte të barabarta me mediat e tjera, të shkruara dhe elektronike.