KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

T’i jepen fund rasteve të dhunës nga policia

04.11.2003

Sipas njoftimeve të shtypit dhe verifikimit në vend nga korrespondenti i Komitetit Shqiptar të Helsinkit në rrethin e Fierit, mësohet se në datën 1 Nëntor 2003, rreth orës 22:00, disa punonjës të policisë të grupit të gatshëm të policisë së rrethit Fier kanë keqtrajtuar  qytetarin Romeno Nexhipi.

Korrespondenti i KSSH-së në Fier mori takim me viktimën dhe familjarë të tij dhe mësoi se shtetasi Romeno Nexhipi, banor i lagjes “16 Prilli” në Fier duke qënë i shoqëruar me dy shokë të tij, ndërsa dilte nga një bar në Fier, është ndaluar nga forca të policisë, të cilat i kanë kërkuar të shkonte me to. Romeno Nexhipi ka kundërshtuar, duke kërkuar në të njëjtën kohë edhe arsyen e këtij shoqërimi. Pas këtij reagimi, punonjësit e policisë e kanë futur Romenon në furgon dhe atje kanë ushtruar dhunë  duke e goditur dhe lënduar atë.

Nga takimi me viktimën në banesën e këtij të fundit, korrespodenti ynë ka vënë re shenja dhune në kurriz, në kyçin e këmbës dhe në fytyrë (mbi vetull).

Gjendja e keqe e shkaktuar nga dhuna e ushtruar ndaj tij ka bërë që përpara se të dërgohej në komisariat, viktima të dërgohej nga punonjësit e policisë  në spital për t’i dhënë ndihmë mjekësore.

Në orën 10:00 të datës 2 nëntor 2003, shtetasi Romeno, pasi ka nënshkruar një deklaratë, është lënë i lire nga forcat e policisë.

Korrespondenti i KSHH-së në Fier ka marrë takim me Drejtorin e Policisë së Qarkut Fier nga ana e të cilit ky veprim është dënuar dhe bëri të ditur se çështja i ka kaluar prokurorisë për ndjekje penale.

Pavarësisht nga rrethanat e ngjarjes, Komiteti Shqiptar i Helsinkit thekson se dhuna fizike nuk mund të legjitimohet në asnjë rast.

Komiteti Shqiptar i Helsinkit denoncon publikisht rastin e mësipërm duke u bërë thirrje organeve përkatëse që të hetojnë këtë çështje me shpejtësi dhe objektivitet.

Komiteti Shqiptar i Helsinkit duke parë përsëritjen e rasteve të përdorimit të dhunës nga forcat e policisë, ngre zërin dhe u kërkon organeve të Ministrisë së Rendit Publik të marrin masat përkatëse për parandalimin e rasteve të tilla arbitrare dhe të dënueshme nga ligji dhe pastrimin e rradhëve të policisë nga punonjës që shkelin ligjin.