KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Mbi tryezën e rrumbullakët me temë: “Sensibilizimi mbi të drejtat e Minoriteteve dhe respektimin e tyre”

02.07.2004

Komiteti Shqiptar i Helsinkit, në bashkëpunim me Fondacionin Soros organizoi në Gjirokastër më datë 30 qershor 2004 një tryezë të rrumbullakët për të rritur shkallën e ndërgjegjësimit të strukturave shtetërore për respektimin më të mirë të të drejtave të minoriteteve në këtë rreth.

Në tryezë, përveç përfaqësuesve të autoriteteve lokale, mori pjesë Kryetarja e Komitetit Shtetëror të Minoriteteve Zjn. Kostandina Bezhani. Ishin të pranishëm edhe përfaqësues të Zyrës së OSBE-së për Qarkun e Gjirokastrës, disa nga organizatat e Shoqërisë Civile në këtë rajon, si dhe përfaqësues të medias së minoriteteve dhe asaj lokale.

KSHH u përfaqësua nga Z. Dhimitër Xhuvani, anëtar i Bordit dhe Znj. Edlira Papavangjeli koordinatore projektesh, si edhe specialistët e ftuar Z. Gjergj Sinani dhe Z. Rajmond Kola.

KSHH paraqiti situatën e të drejtave të minoriteteve në këtë zonë parë nga këndvështrimi i tij.

KSHH mendon se autoritetet shtetërore përkatëse kanë bërë përpjekje për të përmirësuar situatën e respektimit të të drejtave të minoriteteve, por ka ende për të bërë.

Krahas rekomandimeve që ka bërë KSHH, përfaqësuesit e minoriteteve ngritën një sërë shqetësimesh si:

Ata kërkuan të bëhet rregjistrimi i popullsisë, ku personat minoritarë të kenë mundësi të identifikohen si të tillë. Të dhënat e zyrtare statistikore do të shërbejnë për të përcaktuar politika dhe strategji më të qarta nga ana e shtetit shqiptar në drejtim të respektimit më të mirë të të drejtave të minoriteteve. Kjo do të shmangë të dhënat kontradiktore.

Tryeza rekomandoi përmirësimin e kuadrit ligjor në fushën administrative si dhe hartimin e një ligji të veçantë kundër diskriminimit.

KSHH dhe përfaqësues të ndryshëm të minoriteteve theksuan se duhet më shumë vëmendje nga ana e shtetit shqiptar për minoritetin rom, vllah dhe komunitetin egjiptian.

Përsa i përket çështjes së arsimit, përfaqësues të minoritetit grek kërkuan që autoritetet përkatëse shtetërore të marrin masa për krijimin e mundësive të arsimit në gjuhën amëtare edhe në arsimin e mesëm.

KSHH vëren se situata paraqitet më problematike për minoritetin rom dhe komunitetin egjiptjan dhe i kërkon autoriteteve shtetërore të marrin masat e nevojshme për të siguruar arsimimin e fëmijëve romë dhe atyre egjiptian.

Përfaqësuesit e minoritetet Grek shprehën shqetësimin për pasaktësinë gjuhësore në tabelat sinjalistike rrugore, si dhe për faktin se këto tabela ishin dëmtuar, ose fshirë pas vendosjes së tyre.

Pjesëmarrësit në tryezë nënvizuan nevojën e rritjes së mundësive për një pjesëmarrje më të gjerë në strukturat e administratës publike në nivel lokal, veçanarisht për përfaqësuesit e minoritetit rom dhe komunitetit egjiptian.

Gjithashtu përfaqësuesit e minoriteteve kërkuan që shtetit shqiptar të rrisë buxhetin për Minoritetet.

Kryetarja e Komitetit Shtetëror të Minoriteteve Znj. Bezhani si dhe përfaqësuesit e autoriteteve shtëtrore lokale premtuan më shumë vëmendje ndaj problemeve të ngritura në tryezë dhe marrjen e masave për përmirësimin e situatës së të drejtave të minoriteteve.