KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

TERROR I TRUPAVE MAQEDONASE MBI POPULLSINË SHQIPTARE

06.09.2001 

Organizata amerikane e të drejtave të njeriut "Human Rights Watch", e njohur në mbarë botën, ka kryer një mision vëzhgimi në Maqedoni. Ajo i ka akuzuar forcat e sigurimit maqedonas për krime kundër njerëzimit. Si shembull konkret përmendet rasti i fshatit Luboten, ku janë vrarë pa shkak 10 vetë, ndërsa 20 shtëpi janë djegur plotësisht. Veç kësaj, 100 veta janë keqtrajtuar egërsisht. Të gjitha këto veprime, konstaton "Human Rights Watch", janë kryer si hakmarrje mbi popullsinë e pafajshme, si hakmarrje për një numër ushtarësh maqedonas të vrarë gjatë veprimeve ushtarake kundër UÇK-së. "Human Rights Watch" akuzon drejtpërdrejt ministrin e brendshëm Bushkovski që ato ditë ka qenë në fshatin Luboten. Shfajësimeve të autoriteteve të Shkupit se forcat maqedonase goditën një bastion  të guerriljeve dhe se viktimat ishin të ashtuquajtur "terroristë", Organizata e Nju Jorkut u përgjigjet se hetimet e bëra prej saj e hedhin poshtë këtë version dhe konkludon se "faktet e grumbulluara tregojnë se sulmi në Luboten nuk ka patur qëllim ushtarak, por është kryer thjesht për hakmarrje kundër popullsisë".

Human Rights Watch shton se dhuna ka vazhduar kundër mijëra civilëve shqiptarë që janë përpjekur të largohen nga fshati. Rreth 100 burra janë shoqëruar për në stacionin e policisë në Shkup ku janë rrahur egërsisht. Organizata amerikane ka verifikuar ngjarjen në vend dhe ka konkluduar se "nuk ka asnjë të dhënë që UÇK-ja ka qenë e pranishme gjatë kësaj kohe në Luboten dhe asnjë nga civilët nuk ka bërë rezistencë me armë. Mbi bazën e këtyre të dhënave forcat e sigurimit maqedonas akuzohen "për krime kundër njerëzimit". Nga pikëpamja e numrit të viktimave të kësaj dhune, theksohet në këtë raport, ato janë më pak se në Bosnjë dhe në Kosovë, por veprimet dhe masakrat kundër popullsisë shqiptare janë të njëjta.

KSHH ka reaguar edhe në disa raste të tjera për të denoncuar dhunën e autoriteteve maqedonase kundër popullsisë shqiptare. Ai merr shkas edhe nga raporti i Human Rights Watch për të ngritur edhe një herë zërin kundër veprimeve të Shkupit që po ushqen një hakmarrje që vë në rrezik bashkëjetesën në atë shoqëri multietnike.