KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Tryezë sensibilizuese për respektimin e të drejtave të minoriteteve dhe komuniteteve në qarkun e Shkodrës

6 Tetor 2004

Komiteti Shqiptar i Helsinkit organizoi më datë 6 tetor 2004 në mjediset e Hotel “Rozafa” në Shkodër një tryezë të rrumbullakët për të diskutuar lidhur me respektimin e të drejtave të minoritetit serbo-malazez, rom dhe komunitetit egjyptian në këtë qark.

Në takim përveç përfaqësuesve të këtyre minoriteteve morën pjesë përfaqësues nga Komiteti Shtetëror i Minoriteteve, organet e qeverisjes vendore (Bashki, Komuna), OSBE-së, drejtorisë arsimore, drejtorë shkollash, policia, gjykatat dhe përfaqësues të OJF-ve që veprojnë në nivel lokal.

Komiteti Shqiptar i Helsinkit, nëpërmjet ekspertëve të tij solli përvojën e mirë të vendeve në tranzicion në lidhje me respektimin e të drejtave të minoriteteve. Gjithashtu, u bë një trajtim i plotë i të drejtave të minoriteteve dhe komuniteteve në Shqipëri nga pikëpamja juridike si edhe respektimi i tyre në qarkun e Shkodrës. KSHH mbi bazën e vëzhgimeve të vazhdueshme që i ka bërë gjendjes minoriteteve, bëri prezente përfundimet dhe rekomandimet e tija në lidhje me respektimin e të drejtave të minoritetit serbo-malazez, minoritetit rom dhe komunitetit egjyptian. 

Takimi u dha mundësi pjesëmarrësve të diskutojnë mbi çështjet e ngritura si dhe për të paraqitur pretendimet dhe shqetësimet e tyre, në lidhje me respektimin e të drejtave të minoriteteve që përfaqësonin.

Në këtë tryezë u ngrit shqetësimi i mosarsimimit të fëmijëve të minoritetit serbo-malazez në gjuhën amtare në shkollat 8-vjeçare. Ky problem është konstatuar edhe nga KSHH, por Ministria e Arsimit dhe e Shkencës ka argumentuar se është një numër i vogël i fëmijëve të këtij minoriteti gjë që nuk plotëson një nga kriteret ligjore për hapjen e shkollës në gjuhën amëtare. KSHH sugjeroi mundësinë e hapjes së kurseve për mësimin e gjuhës serbo-malazeze nëse plotësohen kriteret ligjore.

Përsa i takon fushës së arsimit, edhe përfaqësuesit e komunitetit egjiptian dhe minoritetit rom e ngritën shqetësimin e shkallës së lartë të analfabetizmit të fëmijëve që i përkasin këtyre komuniteteteve. Ndërkohë nënkryetarja e Bashkisë, e pranishme në takim premtoi hapjen e një shkolle për fëmijët romë dhe egjiptianë në lagjen “Iliria”.

Një tjetër shqetësim që u nënvizua nga të pranishmit, por edhe nga përfaqësuesit e lartë të organeve të qeverisjes vendore në Shkodër ishte edhe problemi i mospasjes së statistikave zyrtare të sakta në lidhje me numrin e këtyre minoriteteve dhe komuniteteve. Nga pjesëmarrësit u theksua se të dhënat zyrtare statistikore të sakta do të shërbejnë më pas për përcaktimin e politikave dhe përmbushjen e detyrimeve nga ana e shtetit shqiptar.

Nga të gjithë të pranishmit u pranua rekomandimi i KSHH-së se duhet më shumë vëmendje nga ana e strukturave shtetërore ndaj minoritetit rom dhe komunitetit egjyptian si dhe u nënvizua ideja e një kontributi më aktiv, koordinim më i mirë i aktorëve të shoqërisë civile në këtë qark, lidhur me minoritetet.   

            KSHH konstaton se autoritetet shtetërore përkatëse kanë bërë përpjekje dhe kanë ndërmarrë masa dhe nisma konkrete në bashkëpunim me disa organizata jo-fitimprurëse, për të përmirësuar disa nga fushat problematike të respektimit të të drejtave të minoriteteve dhe komuniteteve në qarkun e Shkodrës.