Deklaratë për shtyp

 

 KSHH do të fillojë zbatimin e një projekti të ri në Bashkinë e Korçës me titull “Monitorimi i Ushtrimit të të drejtave të minoriteteve në bashkinë e Korçës”

 

Komiteti Shqiptar i Helsinkit është organizata e parë jo-qeveritare e cila është themeluar më 19 Dhjetor 1990 si Forumi për Mbrojtjen e Lirive dhe të Drejtave Themelore të Njeriut. Më 22 mars 1992, organizata u anëtarësua pranë Federatës Ndërkombëtare të Helsinkit për të Drejtat e Njeriut me emërtimin Komiteti Shqiptar i Helsinkit. Misioni kryesor i KShH-së është vëzhgimi i respektimit të të drejtave dhe lirive të njeriut, rivendosja e të drejtave të shkelura, ndërgjegjësimi i shtetasve për mbrojtjen e të drejtave dhe lirive të tyre dhe përmirësimi i legjislacionit dhe i praktikës për zbatimin e ligjit nëpërmjet oponencave dhe rekomandimeve. Pjesë e këtij misioni është, gjithashtu, edhe rritja e përgjegjshmërisë së administratës publike në zbatimin me korrektësi të ligjit nëpërmjet rritjes së kapaciteteve të kësaj administrate.

Një ndër drejtimet kryesore të veprimtarisë së Komitetit Shqiptar të Helsinkit është mbrojtja dhe promovimi i të drejtave të minoriteteve në Shqipëri. Si organizata e parë jo-qeveritare në vend, KSHH ka nje eksperincë pothuajse 15-vjeçare në fushën e minoriteteve.

 

Në kuadër të veprimtarisë së tij në fushën e minoriteteve, KSHH do të fillojë zbatimin e një projekti të ri në Bashkinë e Korçës me titull “Monitorimi i Ushtrimit të të drejtave të minoriteteve në bashkinë e Korçës”. Duke qenë një qytet me 4 minoritete (maqedonas, rom, arumun) dhe një komunitet, atë egjyptian, Korça u përzgjodh si qyteti i parë model për zbatimin e projektit.

            Qëllimi i projektit është vlerësimi i respektimit të të drejtave të minoriteteve në këtë qytet, dhe evidentimi i mundësive për zhvillimin e tyre. Gjithashtu, nëpërmjet tij synohet të rritet pjesëmarrja e minoriteteve në vendimmarrje vendore dhe të forcohen marrëdhëniet e tyre me pushtetin vendor. Zbatimi i këtij projekti do t’u japë qytetarëve një mjet për të përfituar nga veprimtaria e administratës vendore dhe për të propozuar përmirësimin në politikat e tyre për minoritetet. Në të njejtën kohë ai do të ofrojë një mjet për vet-vlerësimin e autoriteteve vendore dhe do të jetë një mënyrë për përmirësimin e kapaciteteve të tyre për  problemet e adresuara nga qytetarët.

Për zbatimin e tij, KSHH do të ketë një bashkëpunim të ngushtë me qeverisjen vendore dhe konkretisht me Këshillin Bashkiak të Korçës. Projekti do bazohet në anketimin e qytetarëve. Gjithëpërfshirja e qytetarëve të bashkisë Korçë në përgjithësi dhe e përfaqësuesve të minoriteteve në veçanti do të jetë element i rëndësishëm për një vlerësim sa më objektiv të gjendjes së të drejtave të minoriteteve në këtë Bashki.

Në fund të zbatimit të projektit do të hartohet një raport i cili do të bazohet në përpunimin e të dhënave që do të dalin nga anketimet e kryera. Në dhjetor 2006 do të organizohet një tryezë e rrumbullakët ku do të paraqiten përfundimet kryesore të raportit të punuar. Në tryezë do të jenë të ftuar aktorë të ndryshëm të Bashkisë Korçë që kanë dhënë kontributin e tyre në zbatimin e projektit dhe/ose të interesuar në këtë fushë.

 

Bashkia e Korçës është përvoja e parë e këtij lloji e cila mendohet të shtrihet edhe në qytete të tjera të Shqipërisë ku ka minoritete dhe komunitete.

 

Ky projekt realizohet me mbështetjen financiare të Friedrich Ebert Stiftung.