KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Tryezë e rrumbullakët për minoritetin grek në Gjirokastër

Në datën 21 Maj 2003, Komiteti Shqiptar i Helsinkit organizoi në qytetin e Gjirokastrës një tryezë të rrumbullakët.  Qëllimi i kësaj tryeze ishte paraqitja e përfudimeve që KSHH kishte nxjerrë nga vëzhgimet e organizuara gjatë muajit Maj në rrethet e Gjirokastrës, Sarandës dhe Delvinës për të parë gjendjen e minoritetit grek në këto zona, respektimin e të drejtave që u njihen minoriteteve nga legjislacioni ndërkombëtar dhe ai i brendshëm.  Tryeza kishte për synim të diskutonte këto përfundime në mënyrë ballafaquese.

Të ftuar në tryezë ishin kryesisht përfaqësues të organeve të qeverisjes vendore, të arsimit, shëndetsisë, rendit, organizatës OMONIA, përfaqësues të komunitetit, etj, me të cilët KSHH realizoi takimet në kuadër të vëzhgimeve.

Në këtë tryezë pati diskutime të gjalla nga të gjithë pjesëmarrësit.

Konstatimi më i rëndësishëm i dalë nga vëzhgimet dhe që u evidentua në tryezë, ishte ai i bashkëjetesës shumë të mirë etnike dhe fetare të minoritetit grek me pjesën tjetër të popullsisë.

Problemet e kushteve të jetesës, të zhvillimit të infrastrukturës, të furnizimit me energji elektrike, të aksesit të biznesit minoritar në zhvillimin ekonomik të zonave,  në vend, paraqiten në parametra pozitivë.  Probleme të tjera që kanë të bëjnë me përmirësimin e rrjetit të të ujësjellësave, të telekomunikacionit, rrjetit rrugor në zonat malore, të pronave, etj, u ngritën në kuadrin e problematikës së përgjithshme të vendit, duke evidentuar dhe nevojën e shfrytëzimit të fondeve të biznesit minoritar (që vepron në këto zona), të kontributit të emigrantëve, fondeve të komunave.

Ndonëse është bërë një largim masiv i familjeve me kombësi greke, në tryezë u konsiderua si një fakt pozitiv, mbajtja ende e disa shkollave me një numër minimal nxënësish; ndërsa dhe krijimi i shkollave qendër ka ndikuar në efektivitetin dhe rritjen e cilësisë së mësimdhënies.  Si problem për zgjidhje u shtrua përshpejtimi i botimit të teksteve të historisë së shkollës 8-vjeçare.

Në formë ballafaquese u diskutua në tryezë çështja e pjesëmarrjes së minoritarëve në organet e qeverisjes vendore, në administratën publike, në organet e rendit, drejtësisë, etj.  Ndonëse ka pretendime të vazhdueshme për këtë çështje nga organizata "OMONIA", u evidentua me shifra dhe fakte konkrete pjesëmarrja aktive e përfaqësuesve të minoritetit në organet e mësipërme, duke argumentuar gjithnjë nevojën e përmbushjes së kritereve për punësim në këto struktura.

Nga intelektualë minoritarë, pjesëmarrës në tryezë, u ngrit problemi i raportit midis legjislacionit që njeh të drejtat e minoritetit dhe vështirësive në praktikë të realizimit të tyre.  U shfaq shqetësimi se ka një lloj "vetveçimi" të minoritarëve.  U dha si shembull ndër të tjera vështirësia që fëmijët me kombësi greke hasin në mësimin dhe praktikimin e gjuhës shqipe.  Kjo dukuri ka pasoja për të ardhmen, duke krijuar vështirësi për punësim në administratën shqiptare, në njohjen e legjislacionit shqiptar, në mbrojtjen e të drejtave të tyre.

Rritja e aksesit të problematikës së minoritetit në Median lokale dhe krijimi i një hapësire edhe në median publike, u shtruan si detyra që duhen përshpejtuar.

Të gjitha prolemet e mësipërme në këtë tryezë të rrumbullakët, u trajtuan në kuadrin e integrimit të minoritetit në shoqërinë shqiptare.

Në tryezë u ra dakord që problemet e ngritura t'u sugjeroheshin organeve kompetente për mundësinë e vënies në rrugën e zgjidhjes.