KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

BRAKTISJE NË RRITJE E SHKOLLAVE NGA NXËNËSIT NË VLORË

11.04.2002 

Korrespondenti i Komitetit Shqiptar të Helsinkit për Vlorën pati një takim në Drejtorinë arsimore si dhe pranë drejtorive të shkollave të qytetit. Nga informacioni i marrë del se fenomeni i braktisjes së shkollave nga nxënësit po bëhet gjithnjë më shqetësues.

Për vitin mësimor 2001-2002 gjendja paraqitet si vijon: Nga klasa e parë deri në klasën e tetë janë larguar gjithsej 91 nxënës. Nxënësit e larguar që kanë mbushur moshën 16 vjeç janë 12. Del se 30% e tyre merren me shitje në rrugë, pjesa tjetër merren me punë pranë familjeve dhe në raste të veçanta përdoren nga të rriturit. Në zyrën e punës konfirmuan se ka raste kur ata shfrytëzohen nga persona të caktuar. Ky problem shqetësues nuk ka tërhequr vëmendjen e duhur as nga drejtoritë e shkollave dhe as nga organet e pushtetit vendor. Mjafton të përmendet se Këshilli i Bashkisë nuk e ka marrë asnjëherë në shqyrtim këtë fenomen që ka dalë këto vitet e fundit. Si rezultat e braktisjes të shkollës në rritje, po fiton gjithnjë e më shumë terren analfabetizmi dhe nuk janë të paktë fëmijët e dëmtuar. Radhët e analfabetëve po shtohen.

KSHH e ka ngritur më se një herë problemin e analfabetizmit në shkallë vendi dhe ka kërkuar që autoritetet përkatëse të marrin masat e duhura kundrejt këtij fenomeni tepër shqetësues që po shfaqet tani në pjesë të ndryshme të vendit. Në këtë rast kemi të bëjmë me shkelje flagrante të ligjit mbi arsimimin e detyruar. Zbatimi i këtij ligji kushtetues (neni 57 i Kushtetutës) është detyrë në radhë të parë e prindërve, por aq më tepër duhet të tërheqë vëmendjen e organeve të arsimit.

KSHH e shikon këtë fenomen si një shkelje të rëndë të të drejtave të fëmijëve. Problemi që ka marrë përmasa shqetësuese duhet të shqyrtohet jo vetëm në nivel lokal, por edhe në atë qendror. Nuk është e tepërt të thuhet se pa marrë masa në kohën e duhur, kjo situatë mund të ketë pasoja të rënda për arsimin në tërësi, pra, edhe për të ardhmen e vendit.