KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

TRAFIKU I FËMIJËVE PO MERR PËRMASA ALARMANTE

 09.09.2002 

Trafiku i fëmijëve është një nga plagët më serioze të shoqërisë sonë.  Janë denoncuar herë pas here raste të shfrytëzimit të egër të shumë fëmijëve, që çohen jashtë vendit, qoftë për të dalë nëpër rrugë si lypës, qoftë çka është edhe më mizore, për transplantimin e organeve.

Rasti i fundit është ai i vajzave të reja shtatzëna në rrethin e Korçës që janë marrë nga një grup banditësh dhe janë çuar në Selanik për të lindur.  Fëmijët e porsalindur bien pastaj në dorë të këtyre kriminelëve në shkëmbim të një shume qesharake.  Kjo është shitblerje fëmijësh, fati i të cilëve varet nga këta grabitës që mund t'i përdorin për qëllime nga më të ndryshmet duke filluar që nga shitja deri te shfrytëzimi më i egër i tyre.  Ky rast i fundit i vajzave që çohen të lindin në Selanik është veçanërisht tronditës.  Ai e shtron çështjen e trafikut të fëmijëve në përmasa alarmante. Kjo është sa një tregues i varfërisë së skajshme, aq edhe një nëpërkëmbje poshtëruese e dinjitetit njerëzor.  Ajo na prek të gjithëve kur mendojmë për këtë plagë të tmerrshme dhe për fatin e zi të këtyre foshnjave.

KSHH e ka shtruar në disa raste detyrën që kanë autoritetet për t'i kushtuar vëmendje serioze kësaj çështjeje, për t'u ndalur dorën këtyre kriminelëve.

Rasti i porsapërmendur kërkon një vëmendje të posaçme. Ka plot arsye të mendohet se autoritetet shqiptare në këtë rast nuk do të lihen të vetme pa përkrahje.  Autoritetet greke nuk do të ngurojnë të japin ndihmën e tyre për të hetuar çështjen; për të vënë dorë mbi shitblerësit e fëmijëve.

Çështja shtrohet edhe nga pikëpamja sociale.  Organet kompetente duhet të shqyrtojnë në vend këtë çështje, të identifikojnë rastet më të rënda dhe t'u japin asistencën e duhur sociale këtyre viktimave të krimit të organizuar.