KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

USHTRIMI I DHUNËS POLICORE, SHFAQJE TË PËRSËRITURA TË SAJ

10.07.2002 

Sipas të dhënave që kanë dalë në shtyp dhe në media një grup të rinjsh nga Tirana që pushonin në Golem janë trajtuar egërsisht nga një grup policësh, me në krye shefin e Komisariatit të policisë së Kavajës, ditën e dielë më 7 korrik. Në denoncimin e menjëhershëm, që i kanë paraqitur Prokurorisë së Përgjithshme, të rinjtë në fjalë e cilësojnë këtë ndodhi si një “akt të pashembullt e të turpshëm të një dhune dhe abuzimi deri në kufijtë e shtazërisë”.

Në letrën e tyre drejtuar Prokurorisë së Përgjithshme thuhet se përveçse janë goditur egërsisht me qytat e armëve dhe me shkopinj gome, disa prej tyre janë hequr zvarrë dhe i kanë shtrirë përtokë duke i goditur me shqelma dhe me grushta. Është vënë në dukje veçanërisht pjesëmarrja, në këtë akt të pashembullt dhune, e shefit të krimeve të këtij Komisariati. Me dorezën e armës ai ka goditur një djalë në rrëzë të veshit duke e lënë të gjakosur dhe pa ndjenja.

Nga ana e Komisariatit të policisë është dhënë një version i ndryshëm i ngjarjes duke thënë se shefi i krimeve ka qenë viktimë e një sulmi prej një shtetasi që është identifikuar dhe do t’i nënshtrohet ndjekjes penale. Por vetë ky burim pranon se gjatë kërkimit të agresorëve ka ndodhur një incident me një grup që janë marrë gabimisht si të implikuar në këtë akt. Kjo konfirmohet edhe në letrën e ankuesve.

KSHH shpreh mendimin që çdo sulm kundër një përfaqësuesi të rendit është një shkelje e rëndë dhe si e tillë duhet të trajtohet në rrugë penale. Por rasti i mësipërm tregon se reagimi i grupit të policisë ka kaluar çdo masë dhe ka degjeneruar në një akt dhune kundër personave të pafajshëm. Kjo nuk e justifikon dhunën e përdorur kundër tyre.

KSHH denoncon këtë akt të përsëritur të përdorimit të dhunës nga ana e policisë kundrejt shtetasve të pafajshëm. U bëhet thirrje organeve të rendit që të vlerësojnë më seriozisht ankesat e shtetasve dhe të jenë më transparentë në marrjen e masave. Përdoruesit e dhunës duhet të vihen para përgjegjësisë dhe masat përkatëse duhet t’i bëhen të njohura opinionit publik.