KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

TË MERREN MASA TË RREPTA KUNDËR PËRDORIMIT TË DHUNËS NË RADHËT E FORCAVE TË RENDIT

11.03.2002   

KSHH ka ngritur shumë herë zërin kundër dhunës së përdorur nga forcat e policisë. Përdorimi i dhunës është trajtuar si një ndër problemet më të mprehta në rradhët e  forcave të rendit. Në deklaratat e tij KSHH ka vënë në dukje raste konkrete të cilat janë verifikuar edhe me vëzhgime në vend. Nuk është e rastit që edhe në raportin vjetor të Departamentit të Shtetit, lidhur me gjendjen e të drejtave të njeriut në Shqipëri, kjo çështje ka zënë një vend të veçantë.

Rastet konkrete janë denoncuar si nga KSHH, ashtu edhe nga Grupi Shqiptar i të Drejtave të Njeriut. Mjafton të përmendet dhuna e përdorur në mjediset e burgut kundër Kryetarit të Partisë Demokratike të Tropojës, A. Haklajt, rast i cili në kohën e vet bëri shumë bujë. Nuk ka raport për të drejtat e njeriut që të mos e përmendë atë. KSHH është shprehur po ashtu lidhur me përdorimin e dhunës në mjediset e Drejtorisë së Komisariatit të Policisë të qytetit të Elbasanit.

Tani së fundi është bërë i njohur edhe keqtrajtimi i egër i qytetarit Sabaudin Çela nga vetë oficeri i policisë gjyqësore të Vlorës. Viktima ka pësuar dëmtime të rënda në trup, aq sa është shtruar në spital për mjekim.

Të gjitha këto akte cënojnë rëndë imazhin e forcave të rendit në Shqipëri. E megjithatë organet kompetente deri tani nuk kanë treguar transparencën e duhur dhe nuk i kanë bërë të njohura masat për hetimin e tyre, vënien e elementit të dhunshëm para përgjegjësisë dhe mënyrën e përfundimit të çështjes. Është krijuar përshtypja se këto akte dhune nuk janë marrë me seriozitetin e duhur dhe kanë mbetur brendapërbrenda në rrethin e ngushtë të drejtuesve të rendit.

Nën presionin e këtyre akteve që janë të shpeshta, më në fund edhe organet kompetente janë vënë në lëvizje dhe kanë bërë të njohura masat që janë marrë kundër përdoruesve të dhunës, pavarësisht nga grada e tyre. Dihet se pak kohë më parë është shkarkuar nga detyra dhe është marrë masa e arrestit kundrejt ish- drejtorit të Komisariatit të Policisë të qytetit të Elbasanit, E. Koseni.

Një masë e njëjtë është marrë tani edhe në Vlorë, kundrejt oficerit të policisë gjyqësore Alnor Hasa, për përdorim dhune kundrejt qytetarit Sabaudin Çela. Oficeri në fjalë u shkarkua nga detyra dhe çështja iu përcuall prokurorisë për ndjekje penale.

KSHH vlerëson rëndësinë të këtyre masave kundrejt elementit të dhunshëm në radhët e policisë. Vlerësohet aq shume edhe transparenca e organeve kompetente, publikimi i menjëhershëm i masave që janë marrë. Këta janë shembuj që tregojnë se autoritetet përkatëse do të angazhohen më tej për vënien e fajtorëve përpara përgjegjësisë. Në këtë mënyrë denoncimet publike të organizatave të të drejtave të njeriut do të gjejnë jehonën e duhur dhe do të merren në konsideratë për të goditur çdo shkelje të ligjit. Çdo akt dhune përbën një atentat kundër të drejtës së sigurisë së personit që është një parim kushtetues dhe është në rradhë të parë detyrë e vetë forcave të rendit që ta mbrojnë atë.