|
Përsëri
dhunë!
15.10.2004
Korrespondentja e Komitetit Shqiptar
të Helsinki në qytetin e Korçës ka njoftuar se në datën
11 tetor 2004 pranë Hotel Valbona është ndaluar dhe
keqtrajtuar Stathi Lako. Gjatë verifikimeve ka rezultuar
se dhuna ndaj tij është ushtruar nga tre policë civilë
dhe shefi i krimeve të rënda pranë drejtorisë së
Policisë së Qarkut të Korçës, Z. Bajram Hyka. Thuhet se
shkak është bërë takimi i Z. Lako me të bijën e Z. Hyka.
Për keqtrajtimin disponohet edhe raporti mjekësor.
Megjithë ndërhyrjet që kjo çështje të mos ndiqej, është
bërë kallëzim në organet e prokurorisë.
Komiteti Shqiptar i Helsinkit, disa
herë ka reaguar publikisht jo vetëm për të vënë para
përgjegjësisë punonjësit e policisë që ushtrojnë dhunë
ndaj shtetasve, por edhe për të marrë masat përkatëse
edukuese dhe parandaluese.
KSHH-ja, me keqardhje konstaton se
raste të tilla janë të përsëritura gjë që tregon se
vlerësimi i këtij fenomeni negativ le mjaft për të
dëshiruar. Kuptohet, kur ndodh e keqja ndërhyet, merret
edhe ndonjë masë, por kryesorja siç dihet është
parandalimi. Lufta kundër kriminalitetit është e
domosdoshme të intensifikohet, por kjo në asnjë mënyrë
nuk mund të justifikojë cënimin e të drejtave të
shtetasve, shëndetin dhe jetën e tyre.
KSHH-ja, në datën 14 tetor 2004
verifikoi në vend edhe një rast tjetër që pretendohet se
është përdorur dhunë ndaj të paraburgosurit Artan Pjetri
në dhomat e paraburgimit të komisariatit të policisë në
Durrës. Në sallën e gjyqit i akuzuari u paraqit me kokë
të lidhur, ndërsa nëna e tij që ishte e pranishme gjatë
gjykimit deklaroi se i biri i kishte thënë se ishte
keqtrajtuar. Vetë Artan Pjetri u tha vëzhguesve të këtij
Komiteti se ai vuante nga sëmundja epileptike, se atij i
kishte rënë të fikët dhe ishte rrëzuar duke u dëmtuar në
pjesë të ndryshme të fytyrës.
KSHH-ja nuk e paragjykon çështjen,
por meqenëse gjatë verifikimeve rezultuan të dhëna
kontradiktore, ka vend që edhe për këtë çështje të
zhvillohen jetime të mëtejshme dhe objektive.
Vlen të përmendet se gjatë bisedës
konfidenciale me Artan Pjetrin me vëzhguesit e KSHH-së,
ai është shprehur se në momentin e ndalimit, megjithëse
ishte vetdorëzuar, ndaj tij ishte ushtruar dhunë.
KSHH mendon se pavarësisht nga fakti
se ky është një pretendim i vonuar, ka interes të bëhen
verifikimet përkatëse sepse disa herë janë vërtetuar
raste të përdorimit të dhunës në momentin e ndalimit apo
arrestimit në flagrancë ose fill pas tyre. Do të
sugjeronim që Ministria e Rendit, duke marrë shkas nga
rastete e shumta tëkeqtrajtimit të shtetasve, të
udhëzojë që ky problem të bëhet objekt shqyrtimi në të
gjitha drejtoritë e policisë në shkallë vendi.
|
