KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Ngjarja e Lazaratit kërkon hetim të shpejtë dhe objektiv

29.10.2004

Komiteti Shqiptar i Helsinkit, duke vlerësuar të dhënat e medias së shkruar dhe asaj elektronike lidhur me ngjarjen e Lazaratit, njoftoi menjeherë korrespodenten e tij në qytetin e Gjirokastrës për të vëzhguar nga afër këtë çështje.

Korrespodentja e KSHH-së kontaktoi në spitalin e Gjirokastrës me dy persona të plagosur në ngjarje, Gentian Pollo, mësues dhe Altin Bejko, pronar i lokalit si dhe kontaktoi me mjekët kirurg që kanë trajtuar personat e plagosur dhe punonjës të policisë vendore.

Nga biseda me personelin mjekësor të spitalit u mësua se në këtë spital kishin ardhur për kurim katër të plagosur dy prej të cilëve kishin dalë nga spitali pasi kishin marrë mjekimet e nevojshme, ndërsa dy të plagosorit e tjerë, njëri prej të cilëve i plagosur më armë zjarri, ishin ende në spital.

Sipas të dhënave paraprake të mbledhura paraqiten dy versione: Gentian Pollo i plagosur në lokal, i intervistuar nga korrespodentja e KSHH-së ka deklaruar se forcat e rendit e kanë goditur dhe me dhunë e kanë futur në furgonin e policisë, duke e keqtrajtuar. Ndërsa Altin Bejko, pranari i lokalit, ka deklaruar se ai është qëlluar nga prapa me armë zjarri.  

Siaps njoftimit për shtyp të Ministrisë së Rendit Publik, i konsideron të ligjshme veprimet e ndërmarra nga forcat speciale të Reneas të ngarkuar me arrestimin e personave në kërkim, të akuzuar ose të dënuar për kryerjen e krimeve me rrezikshmëri të theksuar shoqërore. Në njoftimin për shtyp të kësaj Ministrie, thuhet gjithashtu se, nga lokali ku ndodhej i kërkuari dhe jashtë tij, forcat e Reneas u qëlluan me armë zjarri gjë që detyroi dhe kundërpërgjigjen me të njëjtat mjete.

Komiteti Shqiptar i Helsinkit mbështet intesifikimin e luftës kundër kriminalitetit si dhe masat për parandalimin e tij. Megjithkëtë, KSHH-ja, ashtu si dhe më parë, ka tërhequr vëmendjen se çdo veprim duhet të jetë në përputhje me ligjin dhe të mos cënohen të drejtat dhe liritë e shtetasve.

Komiteti Shqiptar i Helsinkit duke mos e paragjykuar ngjarjen i bën thirrje organeve të prokurorisë që çështja të hetohet me shpejtësi dhe objektivitet. Në këtë kuadër, është e nevojshme të bëhet e qartë nëse në veprimet e forcave të Reneas ka patur ose jo kapërcim të kufijve të mbrojtjes, si dhe përdorim të dhunës të kundraligjshme.

KSHH sugjeron gjithashtu, që rezultatet e hetimit të bëhen të qarta për opinionin shoqëror. Kjo do të ndikonte pozitivisht në sqarimin e  rrethanave në të cilët  u zhvillua ngjarja e mësipërme.