KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Arbitrariteti dhe dhuna duhen ndëshkuar

Tiranë, 3 shtator 2003

Këto ditët e fundit në shtypin e përditshëm dhe në televizion është njoftuar se punonjës të policisë të rrethit të Matit kanë ushtruar dhunë në dëm të vëllezërve Behar, Ali dhe Mirian Bedolli, banues në Mat.  Lidhur me këtë rast, gjithashtu bashkëshortja e Behar Dedollit i ka drejtuar një letër ankese Komitetit Shqiptar të Helsinkit, nëpërmjet së cilës ajo ankohet se në mbrëmjen e 24 gushtit 2003, forca të policisë janë futur në mënyrë arbritrare në shtëpinë e saj dhe në prani të pjesëtarëve të familjes kanë ushtruar dhunë mbi bashkëshortin e saj, Beharin duke e goditur këtë edhe me sende të forta.  Pas marrjes nga shtëpia, si pasojë e gjendjes të rënduar fizike, Behari u dërgua në spitalin e Burrelit.  Më vonë, ai është shoqëruar nga forcat e policisë nga spitali për në komisariat, pa u trajtuar plotësisht nga ana mjekësore. Sipas të dhënave të mësipërme, bëhet e ditur gjithashtu se nga policia janë keqtrajtuar edhe vëllezërit e Beharit, Aliu dhe Miriani.

Komiteti Shqiptar i Helsinkit e sheh të nevojshme të theksojë se në bazë të ligjit, ndaj personit i cili akuzohet për kryerjen e veprës penale dhe ndaj të cilit Gjykata ka vendosur si masë sigurie arrest në shtëpi, nuk duhet të ushtrohet dhunë, në asnjë rast edhe nëse ai shkel kufizimet e caktuara në vendimin e dhënë nga gjykata. Në raste të tilla mund të kërkohet revokimi i vendimit të dhënë ndaj tij.

KSHH vlerëson me kujdes ankesat e shtetasve si dhe të dhënat e medias së shkruar ose elektronike, por asnjëherë ai nuk paragjykon çështjet që janë objekt hetimi ose gjykimi.  Është kjo, arsyeja, që ne I drejtohemi organeve kompetente të Prokurorisë dhe të Ministrisë së Rendit Publik, që kjo çështje të shqyrtohet me shpejtësi dhe objektivitet duke sqaruar jo vetëm rrethanat e ngjarjes por edhe duke vënë para përgjegjësisë personat përgjegjës. KSHH sugjeron gjithashtu që për efekte transparence, brënda kufijve që lejon ligji të bëhen publike nga ana e Policisë së Shtetit masat e marra për rivendosjen e të drejtës së cënuar.