|
Edhe
Një Herë Kundër Dhunës Policore
Tiranë, datë
09.01.2003
Që në fillim kur në Korçë u shtrua
çështja e vdekjes së qytetarit Gazmend Tarhillari, u
shfaqën dyshime mbi përdorimin e dhunës nga ana e
policisë. Korrespondentja e këtij Komiteti për Korçën,
Znj. Keti Qirinxhi, duke shprehur qëndrimin e KSHH
protestoi për përdorimin e dhunës nga ana e policisë.
KSHH e ka vënë në dukje më se një
herë përdorimin e dhunës nga ana e policisë dhe i ka
denoncuar ato publikisht. U është bërë thirrje organeve
të rendit të marrin masat përkatëse për të mënjanuar
elementin e dhunshëm nga radhët e tyre. Shembujt e
përsëritur të përdorimit të dhunës që arrin kulmin me
rastin e përmendur më lart, tregojnë se fatkeqësisht,
nuk është treguar kujdesi i duhur për të vënë rregull në
radhët e policisë.
KSHH përshëndet deklaratën e Avokatit
të Popullit Z. Ermir Dobjani, i cili gjatë shqyrtimit të
raportit vjetor të policisë së shtetit, ngriti zërin dhe
denoncoi hapur rastet e shumta të përdorimit të dhunës
nga ana e policisë.
KSHH merr shënim edhe për prononcimin
e Ministrit të Rendit Z. Luan Rama i cili e pranoi
përgjegjësinë e policisë dhe implikimin e saj në veprime
të dhunshme që janë shkelje të rënda të ligjit. Mund të
shpresohet se ky rast i dhimbshëm do të jetë një thirrje
alarmi për të shqyrtuar gjithë situatën në sistemin e
organeve të rendit, me qëllim që policia t'i përmbahet
rigorozisht ligjit dhe të kryejë funksionin e saj
kryesor për t'u vënë në mbrojtje të të drejtave të
qytetarit.
U bie po ashtu si detyrë organeve të
prokurorisë të ndalen posaçërisht te ky rast, të
përcaktojnë përgjegjësitë për të marrë masa kundrejt
shkelësve të ligjit.
|
