KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Shëndeti dhe jeta e njerëzve mund të rrezikohet

10.03.2004

Në emisionet televizive dhe shtypin e sotshëm jepet alarmi se sipas konstatimeve në vend, në magazinën e ish kombinatit Poligrafik të Tiranës, ndodhet një sasi e konsiderueshme Cianuri (helm me rrezikshmëri të theksuar). Një rast i tillë nuk është i vetmi. Edhe më parë Komiteti Shqiptar i Helsinkit ka reaguar ndaj mbajtjes në mënyrë krejt të papërshtatshme dhe në kundërshtim me rregullat e lendëve helmuese në zonën e Porto Romanos.

Komiteti Shqiptar i Helsinkit bashkohet me shqetësimin e medias elektronike dhe asaj të shkruar dhe i bën thirrje në rradhë të parë organeve përkatëse shtetërore që me urgjencë të fillojnë transportimin e sasive të mësipërme të Cianurit ose të helmeve të tjera nga ambjentet e ndërmarrjes së mësipërme për në vende të sigurta.

Komiteti Shqiptar i Helsinkit sjell në vëmendje të banorëve në afërsi të kësaj magazine ose punonjësve të tjerë, shëndeti dhe jeta e të cilëve në kushte dhe rrethana të paparashikuara, mund të vihet në rrezik, se ata kanë të drejtë ta ngrejnë zërin dhe t’i kërkojnë shtetit t’i japë fund kësaj gjendje.

Për Komitetin Shqiptar të Helsinkit misioni i të cilit është të mbrojë të drejtat e shtetasve edhe në këtë fushë nuk mund të përbëjnë justifikim pretendimet se ndërmarrja nuk paguan shpenzimet për transport, se ky objekt ruhet me roje (pa armë) etj.

Komiteti Shqiptar i Helsinkit denoncon faktin se çështja zvarritet edhe pse organet përkatëse shtetërore janë në dijeni se në këtë magazinë ka helme dhe megjithëse e pohojnë këtë fakt, ato nuk marrin masa urgjente për të mbrojtur jetën e punonjësve dhe të banorëve pranë këtyre magazinave. 

Komiteti Shqiptar i Helsinkit duke marrë shkas nga ky rast kërkon që problemi i mbajtjes, depozitimit dhe transportimit të helmeve të ndryshme të studiohet në shkallë Republike dhe Qeveria shqiptare të përgatisë një plan të shpejtë veprimi dhe buxhetet përkatëse për zgjidhjen e tyre.

Për Komitetin Shqiptar të Helsinkit, pritmëria është e dënueshme dhe mund të shoqërohet me pasoja të dëmshme. Masat parandaluese në këtë drejtim janë të domosdoshme.