KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Më shumë përkujdesje, humanizëm  dhe trajtim profesional të të sëmurëve me HIV/SIDA

Tiranë, më 11 Shkurt 2004

Gjatë viteve të fundit shoqëria shqiptare po  përballet  me një sëmundje të rëndë dhe me pasoja   të shumta siç është virusi HIV dhe  ai i SIDA–s.  Për fat të keq numri i shtetasve shqiptarë  të infektuar nga këto viruse është në rritje. Kjo situatë duhet  të shqetësojë seriozisht shtetin  dhe  gjithë shoqërinë shqiptare. Është fjala për masa më të efektshme parandaluese dhe për një sensibilizim më të madh të shoqërisë në tërësi, duke filluar nga familja, shkolla, shtresat e ndryshme të shoqërisë, veçanërisht në zonat ku informimi i njerëzve është i pakët ose pothuajse mungon.  Gjithashtu, fjala është për një trajtim  më human dhe përkujdesje njerëzore për  të sëmurët me HIV/SIDA dhe familjarët e tyre.

Komiteti Shqiptar i Helsinkit  shpreh publikisht shqetësimin e tij  rreth  disa shkrimeve në median e shkruar ditët e fundit ku  objekt shkrimi kanë qënë raste të të sëmurëve me këtë virus. Problemet që trajtohen në këto shkrime janë në fakt të një rëndësie të veçantë dhe që duhet të tërheqin sidomos vëmendjen e organeve përkatëse shtetërore. Në këtë drejtim, ne pajtohemi plotësisht me shqetësimin e ngritur nga media për të sensibilizuar publikun  për një kujdes  më të madh ndaj  të sëmurëve dhe familjarëve të tyre.

Nga ana tjetër, Komiteti Shqiptar i Helsinkit  terheq vëmendjen tek domosdoshmëria e ruajtjes së sekretit profesional. Është e vërtetë që media në shkrimet e saj nuk përmend emra personash të infektuar nga virusi HIV/ SIDA, por ajo jep  të dhënat të tjera të hollësishme që krijojnë të gjitha mundësitë, të paktën për një rreth njerëzish,  të identifikojnë personat dhe rrethin familjar të tyre.

Lidhur me këtë problem, Komiteti Shqiptar i Helsinkit  e shikon  të nevojshme  të sjellë  në vëmendje të personelit shëndetësor dhe atij që duhet të kujdeset  për të sëmurët, nenin 18 të ligjit Nr. 8689, datë 16-11-2000 “Për parandalimin e përhapjes së infeksionit HIV/AIDS në Republikën e Shqipërisë”, ku thuhet: “Personeli i laboratorit që kryen ekzaminimin nuk ka të drejtë t’u tregojë rezultatin pozitiv të infektuarit me HIV, ose të afërmve të tij.”  Kjo duhet të bëhet vetëm nga persona të autorizuar me ligj. Në po këtë ligj, theksohet se vetëm sipas pëlqimit të personit të infektuar, ky rezultat u komunikohet personave të tjerë që ai dëshiron. Legjislacioni e parashikon qartë se ky informacion është absolutisht i  ndaluar t’i jepet  të afërmve dhe aq më tepër medias.

Dhënia e informacioneve të tilla  medias ose njerëzve të tjerë është në kundërshtim flagrant  me  nenet 9 të ligjit  “Për parandalimin e përhapjes së infeksionit HIV/AIDS në Republikën e Shqipërisë”,  dhe dënohet sipas kodit penal i cili në nenin 121  të tij sanksionon se “Përhapja e një sekreti që i përket jetës private të një personi nga ai që e siguron atë për shkak të detyrës ose profesionit dënohet me burgim deri në një vit, ndërsa kur bëhet me qëllim fitimi ose për të dëmtuar një person tjetër, dënohet deri në dy vjet.

Nga informacionet dhe kontaktet që Komiteti Shqiptar i Helsinkit ka patur me të sëmurë të tillë, vëren se ende shteti nuk  ka zbatuar detyrimet ligjore ndaj të sëmurëve me HIV/SIDA dhe se këta të fundit detyrohet të sigurojnë vetë me mundësitë e tyre financiare barnat e nevojshme të cilat janë jashtëzakonisht të kushtueshme dhe të pamundura për t’u siguruar në tregun shqiptar.

 Duke marrë shkas për sa u tha më sipër:

1. KSHH nëpërmjet kësaj deklarate u bën thirrje organeve përkatëse shtetërore që në zbatim të ligjit konkretisht të nenit  11 i këtij ligji, ku thuhet se: “Shteti siguron çdo lloj kujdesi shëndetësor, barnat për mjekim ambulator ose në spital, si edhe transportin falas për të përcaktuar nevojat e kujdesit mjekësor për qytetarët shqiptarë të sëmurë me HIV/AIDS.”   të fillojë  sa më shpejt  sigurimin falas të barnave.

2. Komiteti Shqiptar i Helsinkit i bën apel personelit shëndetësor për një trajtim më human dhe profesional të të sëmurëve  me HIV/SIDA.

3. KSHH i sugjeron medias së shkruar dhe asaj elektronike që në raste të tilla, si edhe në të gjitha rastet që kanë të bëjnë me jetën private të shtetasve të tregohet e kujdesshme, jo vetëm se nxjerrja e të dhënave mund të cënojë dinjitetin e personit, por mund të shoqërohet edhe me pasoja të tjera të dëmshme  për të sëmurët dhe familjarët  e tyre.

4. Komiteti Shqiptar i Helsinkit i bën apel  medias  shqiptare të informojë dhe sensibilizojë më mirë publikun për të parandalimin  e kësaj sëmundje dhe të respektojë privatësinë e  të sëmurëve.

5. Komiteti Shqiptar i Helsinkit i bën apel në mënyrë të veçantë institucioneve arsimore, edukatorëve edhe shoqërisë civile shqiptare që vepron në këtë fushë të rrisë vëmendjen ndaj këtij grupi njerëzisht dhe të  rrisë ndjesinë qytetare për një trajtim më human dhe profesional të sëmurëve  me HIV/SIDA,