KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

DY VAJZA VIKTIMA TË HELMIMIT

 23.09.2002

Dy motra të reja, njëra 27 vjeç, dhe tjetra 25 vjeç, kanë gjetur vdekje të menjëhershme pasi kanë ngrënë dy ëmbëlsira të blera në një treg.  Ndihma mjekësore ka qenë e pafuqishme për shmangien e kësaj ngjarjeje fatale.  Ekspertiza mjeko-ligjore duhet të nxjerrë shkaqet e vërteta të vdekjes së menjëhershme të të dy vajzave.  Është njoftuar se çështja do të merret në shqyrtim nga organet e specializuara përpara se të jepen shkaqet.

Por nga ana tjetër, pa pritur përfundimin e analizave, është shprehur dyshimi se në origjinë të kësaj tragjedie mund të jetë një dozë e lartë e helmit në gjak që lidhet me faktin se të dy vajzat kanë qenë punonjëse të një fabrike këpucësh italiane.

Pa e paragjykuar përfundimin që është thënë se do të jepet me saktësi vetëm pas dy javëve, KSHH ngre çështjen e kushteve të punës në disa fabrika e punishte, shpesh pronë e firmave të huaja.  Ata shfrytëzojnë punonjëset shqiptare jo vetëm duke u dhënë shpërblime tepër të ulëta, por edhe pa siguruar kushte pune të përshtatshme.  Dyshime dhe shqetësime lidhur me këtë fakt të vërtetë, janë shprehur edhe në të kaluarën më se një herë.  Kjo shtron çështjen e përgjegjësisë, si të organizatave sindikale, ashtu edhe të organeve shtetërore që nuk kanë reaguar ndaj këtyre shkeljeve e trajtimeve çnjerëzore.  Shfrytëzimi i skajshëm i punonjësve në këto fabrika e punishte është një dukuri tanimë e përhapur dhe është e pafalshme që punonjësit e tyre të lihen pa mbrojtje në fatin e tyre.

KSHH mendon se një gjendje e tillë, kur shfrytëzohen egërsisht dhe fyhen punonjësit shqiptarë, duhet të tërheqë vëmendje serioze.  Ngjarja tragjike kërkon jo vetëm sqarimin e plotë dhe përfundimtar të shkaqeve, por edhe ndërmarrjen e një aksioni të gjerë për të vëzhguar situatën në këto fabrika e punishte që nisen vetëm nga motive fitimi dhe që tregojnë një shpërfillje kriminale për gjendjen e punonjësve të tyre.