KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

NEVOJË URGJENTE  PËR MBROJTJEN E SHËNDETIT TË QYTETARËVE

08. 10. 2002

Në Elbasan dalin dy probleme shqetësuese për shëndetin e qytetarëve. Tanimë po bëhet një kohë e gjatë që ish kombinati metalurgjik i Elbasanit po kthehet në burim të sëmundjeve të rrezikshme.Veprimtaria që vazhdon të zhvillohet në një krah të metalurgjikut po bëhet shkak për ndotje të ambientit. Të gjithëve u zë syri se si prej tij dalin gazra helmuese duke rënduar atmosferën. Pasojat nuk kanë munguar dhe ka pasur qytetarë që janë prekur nga sëmundje tepër të rënda dhe shpesh të pashërueshme.

Mendimi i specialistëve është se në këto kushte metalurgjiku, me veprimtarinë qoftë edhe të pjesshme, është një rrezik për shëndetin e banorëve, veçanërisht të banorëve të Bratasheshit. Ndonëse çështja është shtruar më se njëherë nuk është marrë asnjë masë për të bllokuar këtë aktivitet ose për të gjetur një zgjidhje që do të garantonte mosprekjen e shëndetit të banorëve.

Një problem i drejtë, po aq i mprehtë dhe që kërkon një ndërhyrje të shpejtë nga ana e pushtetit vendor është ai i Llixhave të Elbasanit. Dihet që Llixhat e Elbasanit janë një qendër kurative që ka funksionuar prej kohësh për trajtimin e sëmundjeve reumatizmale. Njoftohet se prej kohësh në trajtimin e ujrave termale ka ndërhyrë dhe po shpërdoron biznesi privat.

Ujrat janë çvendosur, janë privatizuar dhe janë vendosur  në vaska në shtëpi private. Kjo tanimë është bërë e zakonshme dhe pacientët në vend që të shkojnë në qëndrën e njohur sipas raportit mjekësor, thirren “të kurohen” në vaskat e shtëpive private. Drejtori i hotelit shtetëror në Llixha shpreh shqetësimin e tij për shfrytëzimin e jashtëligjshëm të ujrave termale nga privatë.

Përveç dëmit që kanë pacientët që shkojnë e futen në vaskat private të joshur nga një çmim më i ulët, drejtori ngre zërin “për rrezikun e sëmundjeve radioaktive që do të pasojnë ndër vite tek të gjithë ata familjarë që shtëpitë e tyre i kanë shndërruar në vaska kurative, vetëm për të nxjerrë ca para”. Specialistët shtojnë se nga avujt e ujave termale çlirohen oksid karboni dhe lëndë të tjera toksike, të cilat thithen nga banorët që kanë futur këto ujra në banesat e tyre.

KSHH tërheq vëmendjen e autoriteteve qëndrore dhe vendore për këto dy probleme serioze me qëllim që të merren masat përkatëse për t’i dhënë fund një gjendjeje të tillë, me pasoja të rrezikshme si për banorët në afërsi të metalurgjikut ashtu dhe për ata të zonës së Llixhave.