Integrimi i Shqipërisë dhe shoqëria civile  Emigrantët  Media  Zgjedhjet  Të miturit  Minoritetet  Policia  Edukimi ligjor  Shërbimi ligjor  Burgjet dhe vendet e paraburgimit  Shëndeti dhe të drejtat e njeriut  Ekzekutimi i vendimeve gjyqësore  Letra të KSHH  Informacione të tjera  PROJEKTE  RAPORTE  DEKLARATA

   ZGJEDHJET PARLAMENTARE

STRATEGJIA 2007-2010

  TAKIME KESHILLIMORE

Të mos cënohet e drejta e privatësisë

Komiteti Shqiptar i Helsinkit ka ndjekur me vëmendje njoftimet në shtyp lidhur me ankesat e disa punonjësve të shëndetësisë që u kërkohet të firmosin një autorizim për të lejuar autoritetin përgjegjës për parandalimin e konfliktit të interesave “të mbledhë informacion dhe të kontrollojë pranë çdo institucioni publik dhe privat të dhënat personale, kudo ku ato janë regjistruar, brenda dhe jashtë territorit të Republikës së Shqipërisë”.

Komiteti Shqiptar i Helsinkit është gjithashtu në dijeni se këtë çështje e ndjek edhe Avokati i Popullit, madje ai ka rekomanduar edhe pezullimin e kërkesës së plotësimit të këtij autorizimi deri në përfundimin e çështjes nga ana e tij.

Por meqë të njejtat ankesa i janë drejtuar edhe KSHH-së, pasi u njohëm me materialet përkatëse, parashtojmë objeksionet tona si më poshtë:

Së pari: Autorizimi i referohet ligjit nr. 9376 datë 7.IV.2005 “Për shmangjen e konfliktit të interesave”. Në të nuk përmendet dispozita përkatëse e këtij ligji që të detyrojë shefat e shërbimeve të lëshojnë një autorizim të tillë autoritetit përgjegjës për parandalimin e konfliktit të interesave.

E shikojmë të nevojshme të theksojmë se autoriteti më i lartë qëndror përgjegjës për zbatimin e këtij ligji është Inspektoriati i Lartë për Deklarimin dhe Kontrollin e Pasurive (shih nenin 41), se ai, veç të tjerave, është kompetent të monitorojë, kontrollojë dhe vlerësojë përputhshmërinë e akteve nënligjore dhe të rregulloreve të brendshme, të miratuara nga institucionet publike për konfliktin e interesave, me parimet dhe detyrimet e këtij ligji të përcaktojë modelin e deklarimit, si dhe të nxjerrë akte nënligjore në formën e urdhërave dhe udhëzimeve (shih nenin 42).

KSHH përshëndet me këtë rast vënien në lëvizje lidhur me këtë konflikt të Inspektoriatit të Lartë të Deklarimit dhe Kontrollit të Pasurisë për të verifikuar në vend përmbajtjen e autorizimit që u është shpërndarë shefave të QSUT “Nënë Tereza”.

Së dyti: KSHH konsideron jo të rregullt dhe të pasaktë frazën e përgjithshme të autorizimit që ka të bëjë me mbledhjen e informacionit nëpërmjet kontrolleve pranë çdo institucioni publik dhe privat, brenda dhe jashtë territorit të Republikës së Shqipërisë.

Kjo frazë e përgjithshme dhe e pakonkretizuar mund t’i lerë shteg edhe mbledhjes së të dhënave të natyrës private apo personale gjë që bie ndesh me dispozitat përkatëse të ligjit nr. 8517 datë 22.VII.1999 “Për mbrojtjen e të dhënave personale”. Në nenin 10 të këtij ligji thuhet se: “Trajtimi i të dhënave personale nga persona të tjerë lejohet vetëm në rast se subjekti i këtyre të dhënave ka dhënë shprehimisht pëlqimin e tij”.

KSHH mendon se është e nevojshme të përcaktohet çfarë të dhënash personale kërkohen nga ky verifikim.

KSHH ka bindjen se ky problem do të zgjidhet në bazë të Kushtetutës dhe të ligjeve në fuqi.