Integrimi i Shqipërisë dhe shoqëria civile  Emigrantët  Media  Zgjedhjet  Të miturit  Minoritetet  Policia  Edukimi ligjor  Shërbimi ligjor  Burgjet dhe vendet e paraburgimit  Shëndeti dhe të drejtat e njeriut  Ekzekutimi i vendimeve gjyqësore  Letra të KSHH  Informacione të tjera  PROJEKTE  RAPORTE  DEKLARATA

   ZGJEDHJET PARLAMENTARE

STRATEGJIA 2007-2010

  TAKIME KESHILLIMORE

Të mos lejohet cënimi i të drejtës së shtetasve për punësim dhe largimi i paligjshëm i tyre nga detyra

Tiranë, më 16 Janar 2006

Këto ditët e fundit në median e shkruar dhe në atë elektronike, u njoftua se së shpejti Këshilli i Ministrave do të miratojë një projekt-vendim që ndalon familjarët dhe të afërmit e qeveritarëve të sotshëm dhe ish-qeveritarëve  që të punojnë në sektorët e doganave, tatimeve dhe prokurimeve publike.

Ky lajm u konfirmua edhe nga Kryeministri i cili u shpreh se së shpejti qeveria do ta miratojë këtë vendim.

Komiteti Shqiptar i Helsinkit edhe pse nuk është njohur me brendinë dhe detajet e këtij projekti, për efekte sensibilizimi dhe parandalimi, vendosi të parashtrojë publikisht objeksionet e mëposhtme:

1. Miratimi i këtij vendimi, pavarësisht nga qëllimet e mira që ai mund të synonte, do të cënonte drejpërdrejtë të drejtat e ligjshme të shtetasve të sanksionuara në nenin 18 të Kushtetutës ku thuhet se “të gjithë janë të barabartë para ligjit, se askush nuk mund të diskriminohet padrejtësisht për shkaqe të tilla si gjinia, raca, feja, etnia, bindjet politike, fetare a filozofike, gjendja ekonomike, arsimore, sociale ose përkatësia prindërore”, në nenin 49 të Kushtetutës ku thuhet se: “Secili ka të drejtë të fitojë mjetet e jetesës së tij me punë të ligjshme që e ka zgjedhur ose pranuar vetë. Ai është i lirë të zgjedhë profesionin, vendin e punës si dhe sistemin e kualifikimit të vet profesional”, si edhe në nenin 107 të Kushtetutës ku thuhet se: “Nëpunësit në administratën publike caktohen me konkurs, me përjashtim të rasteve të parashikuara nga ligji. Garancitë e qëndrimit në detyrë dhe trajtimi ligjor i nëpunësve publikë rregullohen me ligj”.

2. Në Kodin e Punës të Republikës së Shqipërisë thuhet se: “Ndalohet çdo lloj diskriminimi në fushën e marrjes në punë dhe të profesionit; se “Me diskriminim kuptohet çdo dallim, përjashtim ose parapëlqim që bazohet në racë, ngjyrë, seks, moshë, fe, bindje politike, origjinë kombëtare, origjinë shoqërore, lidhje familjare, të meta fizike ose mendore që cënon të drejtën e individit për të qenë i barabartë në punësim dhe trajtim”.

3. KSHH mendon se raste të tilla nuk mund të përfshihen në nocionin e “konfliktit të interesave”. Interpretimet e zgjeruara dhe subjektive lidhur me konfliktin e interesave do të cënonin rëndë të drejtat e ligjshme të shtetasve dhe si rrjedhim mund të shoqëroheshin me pasoja të dëmshme. Koncepti i “konfliktit të interesave” është real dhe jo i supozuar. Ai mbështet në kritere ligjore.

Për KSHH-në sikur rastet e ndalesave për punësim ose për largim nga detyrra që mendohet të miratohen në vendimin e Këshillit të Ministrave, do të konsideroheshin të ligjshme, e arsyeshme do të ishte që i njejti kriter të ndiqej edhe për sektorë të tjerë siç mund të ishin: prokuroria, gjykata, Kontrolli i Lartë i Shtetit, Inspektoriati i Kontrollit dhe Verifikimit të Pasurive të zyrtarëve, etj., që siç dihet janë sektorë të rëndësishëm dhe delikatë.

4. KSHH e sheh të nevojshëm të evidentojë gjithashtu faktin se në ligjin nr. 8549, datë 11.11.1999 “Status i nëpunësit civil” janë përcaktuar rregullat e pranimit dhe largimit të punonjësit të shërbimit civil që mbështeten në parimet e profesionalizmit dhe të transparencës, të përgjegjësisë dhe të korrektësisë në zbatimin e legjislacionit në fuqi (neni 3).

Përsa i përket rregullave të etikës në administratën publike vepron ligji nr. 9131, datë 8.09.2003. Në këtë ligj bëhet fjalë për konfliktin e interesave (neni 4) si dhe për shmangien e konfliktit të interesave (neni 5).

5. KSHH ka gjithashtu parasysh edhe ligjin nr. 9367, datë 7.04.2005 “Për parandalimin e konfliktit të interesave në ushtrimin e funksioneve publike”. Në këtë ligj jepet përkufizimi i nocionit “konflikt i interesit” (neni 3). Ndërsa në nenin 32 të ligjit të mësipërm bëhet fjalë për përkufizimet për zyrtarin e organit tatimor ose doganor. Asnjë ndalesë nuk parashikon kjo dispozitë për marrjen në punë ose për largimin nga detyra të personave që mund të jenë familjarë ose të afërm të zyrtarëve të lartë, të qeveritarëve ose ish-qeveritarëve.

KSHH mendon se përmbajtja e kësaj deklarate mund t’i shërbente rivlerësimit të kësaj çështjeje që ka të bëjë me respektimine Kushtetutës dhe legjislacionit në fuqi.

Për arsyet e përmendura më lart, KSHH i sugjeron qeverisë të mos e miratojë vendimin për të cilin bëhet fjalë.