KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Tubimet janë të ligjshme, por pa dhunë

09.02.2004  

Komiteti Shqiptar i Helsinki duke marrë shkas nga ngjarjet e 7 Shkurtit 2004 deklaron se:

Tubimet e organizuara nga forcat politike si edhe tubimet qytetare që nuk shoqërohen me përdorimin e dhunës janë jo vetëm të ligjshme, por edhe elementë që tregojnë nivelin emancipues të një shoqërie demokratike.

Është e drejtë e çdo force, grupimi politik dhe e qytetarëve të protestojë për ato çështje që ata mendojnë se kanë të bëjnë me keqqeverisjen ose me problemet që përballon vendi. Nëpërmjet protestave paqësore ata kanë të drejtë të paraqesin alternativa për zgjidhjen e çështjeve. Është detyrë e qeverisë të reflektojë ndaj kërkesave të opozitës dhe ankesave të shtetasve.

Komiteti Shqiptar i Helsinkit, si një organizatë jo-fitimprurëse, e angazhuar në fushën e mbrojtjes dhe lirive të shtetasve shprehet “pro” të gjitha formave të tubimeve që zhvillohen në përputhje me parimet e përcaktuara në Konventën Evropiane për të Drejtat e Njeriut, në Kushtetutën tonë dhe ligjin “Mbi tubimet”.

Në këtë vështrim, KSHH me keqardhje konstaton se në protestën e 7 shkurtit 2004 ishin të pranishëm edhe elementë të dhunshëm të cilët u orvatën të cënojnë institucionet shtetërore. Edhe pse kjo gjendje u kapërcye me maturi, shpresojmë që në të ardhmen të merren të gjitha masat që tubimet të zhvillohen të qeta dhe gjatë zhvillimit të tyre të parandalohen aktet e dhunës.

Opinioni publik i shqetësuar nga zhvillimet e fundit pret që qeveria, me transparencë të marrë të gjitha masat e mundshme për t’i dalë zot problemeve që shtrohen për zgjidhje.