KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Kriza e Bathores mund të zgjidhet vetëm me mirëkuptim dhe në bazë të ligjit

Tiranë, më 25.04.2003

Në lagjen e jashtme të Tiranës në zonën e Bathores, kanë dalë prej kohësh dhe kanë mbetur pa zgjidhje disa probleme themelore që lidhen me banesat dhe legalizimin e tyre.  Mostrajtimi i këtyre problemeve nga ana e organeve kompetente ka shkaktuar reagimin e banorëve.  Shumë herë u janë bërë premtime për zgjidhjen e tyre, por problemet vazhdojnë të jenë të pazgjidhura.  Nuk janë bërë përpjekjet e duhura për zgjidhjen e problemeve tepër të mprehta e serioze.  Mungon uji, mungojnë dritat, mungon infrastruktura e nevojshme.

KSHH shpreh mendimin se kjo zvarritje e zgjidhjes së problemeve nga autoritetet është bërë shkak për shpërthimin e reagimeve nga ana e banorëve.  Por gjithsesi, dhuna nuk duhet të jetë mjeti për t'i zgjidhur këto probleme.  Njoftohet se në kryerje e sipër të detyrave për sigurimin e rendit, pjesëtarë të forcave të policisë janë dëmtuar ose plagosur dhe kjo i kalon caqet e manifestimit paqësor.  Duhet mirëkuptim midis banorëve dhe autoriteteve me qëllim që problemet të zgjidhen sa më shpejt dhe mbi baza ligjore.

Është me rëndësi që të fillojë menjëherë të funksionojë një tryezë bisedimesh ku banorët të shtrojnë problemet e tyre dhe ku autoritetet të marrin angazhime konkrete për t'i dhënë fund zvarritjeve të vëna re gjatë këtyre viteve.