KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Rikthimi i denimit me vdekje eshte i pajustifikueshem

Komiteti Shqiptar i Helsinkit, konsekuent në qëndrimin e tij për heqjen e dënimit me vdekje, ka mbështetur vendimin e Gjykatës Kushtetuese të dhjetorit 1999 që ka shpallur si të papajtueshëm me Kushtetutën e Republikës së Shqipërisë masën e dënimit me vdekje që parashikohej në disa nene të Kodit Penal si dhe vendimin e Kuvendit të Shqipërisë që rishikoi në frymën e Kushtetutës dhe të vendimit të mësipërm të gjitha dispozitat ligjore që kishin të bënin me dënimin me vdekje dhe që vendosi heqjen e tyre.
KSHH mendon se deklaratat e pjesshme për nevojën e rivendosjes së dënimit me vdekje duke marrë shkas nga kryerja, këto kohët e fundit, të disa veprave me rrezikshmëri të theksuar shoqërore, nuk janë të justifikueshme, jo vetëm se kjo do të ishte një hap prapa, por edhe për faktin se zizkzaket në dinamikën e kriminalitetit nuk duhet të çojnë në konkluzione të nxituara dhe emocionale të momentit.
Duhet pasur gjithashtu parasysh edhe faktin që ne jemi anëtarë të KE-së, se vendi ynë synon të integrohet në familjen evropiane. Përvoja e vendeve demokratike madje edhe e vendit tonë, ka vërtetuar se dënimi kapital nuk ka qenë dhe nuk mund të jetë faktor përcaktues në uljen e kriminalitetit.
Mbas heqjes së dënimi me vdekje, u shtrua detyra e thellimit të reformës në drejtësi, e intensifikimit të luftës kundër korrupsionit, e rritjes së nivelit profesional të punonjësve të policisë, të prokurorëve dhe gjyqtarëve, si dhe zbatimi rigoroz i ligjit. Në këto tregues edhe pse janë arritur  disa rezultate, KSHH mendon se ka ende të meta dhe boshllëqe serioze.
Ne nuk na mungon legjislacioni për të goditur kriminalitetin. Sanksionet ligjore për disa vepra me rrezikshmëri të theksuar shoqërore parashikojnë si masë dënimi edhe burgimin e përjetshëm.
Komiteti Shqiptar i Helsinkit u sugjeron organeve përkatëse që të vlerësojnë siç duhet dhe në kohën e duhur sinjalizimet dhe ankesat e qytetarëve sepse në të kundërtën ato mund të nxisin vetëgjyqësinë.
KSHH çmon si nevojë të domosdoshme jo kërkesën për rivendosjen e dënimit me vdekje, por atë të krijimit të një fronti unik kundër kriminalitetit si dhe të masave efektive të gjithanshme parandaluese.