KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Mjaft gjuhës së urrejtjes në debatin politik

03.12.2003

Në vend është krijuar një atmosferë tepër e tensionuar për shkak të ballafaqimit të forcave politike rreth problemeve më të mprehta të ditës. Shkallëzimi i tensioneve rrezikon të cënojë stabilitetin dhe të errësojë perspektivën në sytë e opinionit të gjerë. Është e kuptueshme që përballë zhvillimeve më të fundit, partitë politike të të gjithë spektrit politik të formulojnë qëndrimet e tyre dhe të paraqesin opsionet përkatëse.

KSHH ka bindjen se interpreton shqetësimin e opinionit në mbarë vendin kur tërheq vëmendjen mbi situatën e krijuar dhe u bën thirrje forcave politike dhe në veçanti dy forcave politike më të mëdha, të shpalosin alternativat me gjuhën e arsyes dhe jo me gjuhën e urrejtjes.

KSHH e ka denoncuar prej kohësh gjuhën e urrejtjes si një faktor që helmon atmosferën politike. Aq më tepër është rasti të shprehet keqardhje për gjuhën e urrejtjes në gojën e politikanëve më në zë, që flasin si përfaqësues të partive përkatëse. Në fjalorin e tyre bëhen akuza nga më të rëndat në drejtim të njëri-tjetrit. Bëhet fjalë për korrupsion, krime të organizuara, veprimtari mafioze. Nuk flitet për fakte dhe prova konkrete dhe shkelet kështu me të dy këmbët parimi i prezumimit të pafajësisë duke injoruar organet kompetente të ndjekjes së krimit dhe të dhënies së drejtësisë

KSHH shpreh bindjen se situata e krijuar me përdorimin pa kufij të gjuhës së urrejtjes në adresë të njëri-tjetrit, nuk i shërben trajtimit serioz dhe zgjidhjes së qëndrueshme të problemeve të mëdha të zhvillimit të vendit në rrugën e demokracisë dhe të integrimit në shkallë evropiane.

KSHH përsërit thirrjen që debati të përqëndrohet në problemet reale me të cilat ballafaqohet vendi dhe jo me akuza të lëshuara vend e pa vend kundër njëri-tjetrit. Partitë politike duhet t’i përshtaten më mirë opinionit të gjerë i cili e ndjek me shqetësim të madh kthesën tepër të dëmshme që ka marrë sot jeta politike.