KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Të respektohen kompetencat

Të mos cënohet parimi i prezumimit të pafajsisë

Tiranë më 17.02.2004

Zëdhënësi i Ministrisë së Rendit Publik në njoftimin për shtyp të datës 16.02.2004, veç të tjerave i është referuar edhe çështjes të ish komisarit Ilirjan Dida që është përjashtuar nga rradhët e policisë.

Komiteti Shqiptar i Helsinkit rezervohet të shprehet lidhur me bazueshmërinë ose jo ligjore të kësaj mase, aq më tepër sepse i interesuari i është drejtuar gjykatës. Si rrjedhim ankesa e Ilirjan Didës do të jetë objekt i shqyrtimit gjyqësor.

Megjithëkëtë, KSHH e shikon të nevojshme ti referohet asaj pjese të njoftimit për shtyp, ku Ministria e Rendit merr atribute që nuk i takojnë duke cënuar në të njëjtën kohë parimin e prezumimit të pafajsisë. Fillimisht vlen të përmëndet se Ministria e Rendit është pjesë e ekzekutivit, ndërsa policia e shtetit institucion i administratës shtetërore.

Në njoftimin për shtyp thuhet se ish komisari Ilirjan Dida është përjashtuar nga radhët e policisë “… nën akuzën e kryerjes së një krimi të rëndë” se ai “… ka favorizuar qëndrimin në detyrë të punonjësve të policisë të inkriminuar...” se “… ka penguar zbulimin e së vërtetës lidhur me vdekjen e një shtetasi …” se “… në ngarkim të ish Komisarit Ilirjan Dida rëndon edhe akuza për ngjarjen e vrasjes së një shtetasi në qarkun e Kukësit, ku në mënyrë evidente … ka manipuluar provat materiale …”

Nëqoftëse Ministria e Rendit ka patur të dhëna për kryerjen e ndonjë vepre penale nga Ilirjan Dida ishte detyra e saj që materialet përkatëse t’ja dërgonte organit të ndjekjes (prokurorisë). Ishte në kompetencën e prokurorit të fillonte, të pushonte ose të refuzonte çwshtjen penale lidhur me kallzimin e bërë. Deri më sot nuk rezulton që Ilirjan Didës ti jetë komunikuar ndonjë akuzë penale. Por edhe në një rast të tillë, sipas Kushtetutës dhe Kodit të Procedurës Penale ai do të prezumohej i pafajshëm, derisa të mos ishte vërtetuar fajësia e tij me vendim të formës së prerë të gjykatës.

Në nenin 20 të Kushtetutës thuhet: “ Kushdo quhet i pafajshëm përderisa nuk i është provuar fajësia me vendim gjyqësor të formës së prerë”.

Në përputhje me Kushtetutës, në nenin 20 pika 3 gërma “d” e ligjit Nr. 8553 datë 25.11.1999, “Për policinë e shtetit” ku bëhet fjalë për rastet e përjashtimit nga policia e shteti thuhet “Kur dënohet penalisht me burgim me vendim të formës së prerë”.

Në përfundim Komiteti Shqiptar i Helsinkit e shikon të nevojshme të evidentojë faktin se Gjykata Europiane e të Drejtave të Njeriut në zbatim dhe interpretim të nenit 6 të Konventës Europiane të të drejtave të Njeriut lidhur me respektimin e parimit të prezumimit të pafajsisë ka qënë konsekuent në qëndrimin e saj.

Në një nga vendimet e saj ajo ka theksuar se prezumimi i pafajësisë është jo vetëm një garanci proceduriale në procesin penal por roli i tij është shumë më i gjërë. Është fjala për mbrojtjen e secilit nga trajtimi prej organeve dhe funksionarëve të shtetit si fajtor për kryerjen e një vepre penale para se një gjë e tillë të vërtetohet nga gjykata.