KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Takimin vlerësues i veprimtarisë së rrjetit

të korrespondentëve në shtatë rrethe të vendit

 25 shtator 2004

Doro Hotel

Më 25 shtator 2004, Komiteti Shqiptar i Helsinkit (KSHH) organizoi një takim vlerësues mbi veprimtarinë dhe kontributin e dhënë nga rrjeti i korrespondentëve të KSHH-së të cilët për periudhën kohore Janar 2002 - Shtator 2004 kanë vëzhguar nga afër situatën e të drejtave të njeriut në shtatë rrethe të vendit si Kukës, Gjirokastër, Fier, Vlorë, Korçë, Elbasan, Shkodër. Ky rrjet ka funksionuar falë mbështetjes financiare akorduar KSHH-së nga fondacioni SOROS, Tiranë.

Në këtë tryezë përveç stafit të KSHH-së dhe korrespondetëve të tij, morën pjesë anëtarë të KSHH-së, si edhe anëtarë të bordit të këtij Komiteti të cilët kanë parë dhe vlerësuar nga afër punën e korrespondentëve gjatë misioneve të përbashkëta mbështetëse.

Në këtë takim vlerësues u bë një prezantim i gjithë veprimtarisë së larmishme të korrespondentëve të KSHH-së nëpër rrethe. Të pranishmit u njohën midis të tjerash me fushat e të drejtave të njeriut të cilat janë vëzhguar në mënyrë sistematike nga korrespondentët e KSHH-së ku është parë nga afër respektimi i të të drejtave të shtetasve nga struktura shtërore të tilla si organet e sistemit gjyqësor, komimsariatet e policisë dhe vendet e paraburgimit, organet e qeverisjes vendore, organet përgjegjëse për administrimin e zgjedhjeve për organet e qeverisjes vendore etj. Gjithashtu, u sollën shifra konkrete të cilët evidentonin numrin gjithnjë në rritje të rasteve të trajtuara dhe verifikuara nga korrespondetët e KSHH-së në rrethe, gjë që flet qartë për prezencën gjithnjë në rritje të tyre tek qytetarët e thjeshtë në rrethe.

Referuesja në këtë takim nënvizoi se krahas veprimtarisë vëzhguese, korrespondentët e KSHH-së nëpërmjet formave të ndryshme sensibilizuese kanë dhënë kontributin e tyre në rritjen e ndërgjegjesimit të shtetasve të thjeshtë për të denoncuar rastet e shkeljeve të të drejtave të tyre nga administrata shtetërore.

Në kuadër të aktiviteteve të këtij rrjeti, një vëmendje të veçantë i është kushtuar nxitjes së kapaciteteve lokale duke përfshirë specialistë të fushave të ndryshme në veprimtaritë e korrespondentëve në rrethe.

U evidentua gjithashtu fakti se korrespondentët e kanë përdorur gjithnjë e më shumë median e shkruar dhe elektronike lokale për të ngritur problemet shqetësuese të respektimit të të drejtave të shtetasve në rrethet e tyre përkatëse si edhe për t’u ardhur në ndihmë qytetarëve të thjeshtë duke u bërë të ditur rrugët dhe mekanizmat e mbrojtjes së të drejtave të tyre në rast shkeljesh.

Në përfundim të takimit u zhvilluan diskutime nga të pranishmit në lidhje me të ardhmen e këtij rrjeti dhe fushat në të cilët do të veprojë ky rrjet. Pjesëmarrësit në këtë takim theksuan se ekzistenca e rrjetit të korrespondentëve e KSHH-së edhe në të ardhmen vlerësohet si mëse i domosdoshëm, rrjet i cili jo vetëm do të vazhdojë të rrisë gjeografikisht veprimtarinë vëzhguese dhe reaguese të KSHH-së por gjithashtu do të shërbejë si faktor i rëndësishëm presioni tek organet shtetërore vendore për një respektim më të mirë të të drejtave të shtetasve nga ana e tyre. Ky rrjet do të vazhdojë të kontribuojë në rritjen e kulturës ligjore në rrethe si edhe në nxitjen e guximit qytetar për të denoncuar dhe vënë përpara ligjit shkelësit e të drejtave të qytetarëve të thjeshtë.