KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

NJË KRIM ME RREZIKSHMËRI TË THEKSUAR SHOQËRORE

05.02.2004

Këto ditë, një një nga lagjet e Tiranës ndodhi një krim tepër i dhunshëm dhe mizor. Gjin Martincanaj nga Lekbibaj i Tropojës vrau vajzën e tij 21 vjeçare Grashe Martincanaj për shkak se nuk ishte kthyer për tre ditë në shtëpinë e prindërve dhe për këtë nuk kishte njoftuar. Të afërmit e vajzës, duke dashur të fshehin autorin e krimit, kanë pretenduar se vajza kishte vrarë vehten. Më vonë, u bë i mundur arrestimi i babait vrasës.

Opinioni publik u trondit kur u dha njoftimi për një vrasje të tillë, aq më tepër kur nga goja e të afërmve të saj u dënua vajza dhe jo vrasësi. “Nuk ka zgjidhje tjetër, veç plumbit për të vënë në vend nderin e humbur”, kështu u shpreh një prej të afërmve të viktimës. “Nuk jemi të shqetësuar, ajo e meritonte një gjë të tillë. Ne shqetësohemi për babanë që do të vuajë në burg për shkak të saj”, u shpreh xhaxhai i vajzës.

Komiteti Shqiptar i Helsinkit, Forumi i Pavarur i Gruas Shqiptare, Qendra Avokatore e Grave, Qendra e Gruas dhe Qëndra Shqiptare për të Drejtat e Njeriut dënojnë këtë vrasje barbare që u krye nën ndikimin e forcës së egër të zakonit, të mentalitetit se gratë dhe vajzat duhet t’i nënshtrohen diktatit të të parit të shtëpisë, se ato duhet të bëjnë një jetë të ndryshur dhe të nënshtruar.

Kjo dhe ngjarje të tjera të kësaj natyre tregojnë se në gjirin e shoqërisë shqiptare që aspiron integrimin në familjen e madhe Evropiane ka ende njerëz që autoriteti më i madh për ta nuk është ligji, por zakoni, që dinjiteti dhe personaliteti i vajzave dhe grave, jo vetëm nuk përfillet, por edhe përçmohet duke arritur deri në aktin më të rëndë, atë të marrjes së jetës.

Duke marrë shkas nga ky rast, që nuk është i vetëm, organizatat tona jo-fitimprurëse nënshkruese të kësaj deklarate, i bëjnë thirrje organeve të drejtësisë dhe veçanërisht gjykatave, që të zbatojnë një politikë të drejtë penale ndaj autorëve të këtyre krimeve. Çdo dënim i butë dhe jo i drejtë mund të inkurajojë kryerjen e krimeve të tilla në të ardhmen

Një rol të rëndësishëm luan sensibilizimi i opinionit shoqëror, intensifikimi i punës parandaluese dhe edukative duke e shtrirë atë jo vetëm në qytet, por edhe në fshat, sidomos në ato zona kur mentalitetet e vjetra dhe forca e zakonit është më e rrënjosur.

Organizatat nënshkruese të kësaj deklarate i bëjnë apel shtetit dhe shoqërsië civile, medias shqiptare që këto probleme të bëhen objekt diskutimi dhe debati jo me fushata, por në mënyrë të vazhdueshme. 

Organizatat nënshkruese të kësaj deklarate i bëjnë thirrje shtetit dhe forcave politike që të preokupohen me seriozisht për të parandaluar krime të tilla.

Organizatat hartuese të kësaj deklarate:

Komiteti Shqiptar i Helsinkit,

Forumi i Pavarur i Gruas Shqiptare

Qendra Avokatore e Grave,

Qendra e Gruas

Qendra Shqiptare për të Drejtat e Njeriut