KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Autoriteti më i lartë është ligji

 Tiranë, më 30. 01.2003

Në shtyp dalin vazhdimisht njoftime mbi raste të gjakmarrjes dhe hakmarrjes.  Gjendja është tronditëse kur merret vesh se janë të shumtë të ngujuarit për shkak të gjakmarrjes dhe hakmarrjes. Nuk kursehen as gratë e as fëmijët, gjë që është në kundërshtim edhe më vetë normat e vjetra kanunore, jo më e papajtueshme me rendin ekzistues në vendin tonë. 

KSHH përsërit pikëpamjen e shprehur disa herë se këtu kemi të bëjmë me një mungesë të shtetit dhe të ligjit. Ky problem, në vend që të kufizohej e të mënjanohej, vazhdon të mbetet shqetësues. Në këto kushte është e domosdoshme një ndërhyrje serioze e autoriteteve shtetërore në nivele të ndryshme për të parandaluar këtë dukuri thellësisht të paligjshme dhe çnjerëzore.  Në këtë drejtim duhet të mabjmë parasysh edhe normën kushtetuese, nenin 21 që thotë qartë se jeta e personit mbrohet me ligj.

KSHH ka vënë në dukje se kjo situatë ka të bëjë kryesisht me dobësitë e sistemit të organeve të drejtësisë. Është pikërisht kjo një nga arsyet që shtetas të veçantë shpesh janë të prirur për vetëgjyqësi. Prandaj organet gjyqësore duhet të kryejnë gjithmonë detyrën mbi baza ligjore, duke vënë përpara përgjegjësisë shkelësit e ligjeve.

Për parandalimin e kësaj dukurie është e nevojshme që, krahas organeve shtetërore, të angazhohet seriozisht edhe shoqëria civile. Janë disa shoqata dhe fondacione të ndryshme që kanë si objekt pajtimin e gjaqeve dhe zgjidhjen paqësore të mosmarrëveshjeve në frymën e ligjeve në fuqi.

KSHH vëren se këtij fenomeni i duhet kushtuar një vemendje e veçantë dhe se çdo shkujdesje do të jetë me pasoja të rënda.  Në fakt, kjo dukuri minon rendin juridik të shtetit.  Duke shprehur shqetësimin e thellë të mbarë opinionit publik, KSHH bën thirrje që çështja të merret në shqyrtim me urgjencë dhe të trajtohet si një prioritet i gjithë shoqërisë shqiptare.