KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

KOMITETI MAQEDONAS I HELSINKIT NËN GODITJEN E AUTORITETEVE

21.01.2002 

Sipas të dhënave të mediave Komiteti Maqedonas i Helsinkit është bërë objekt goditjesh nga ana e autoriteteve maqedonase. Është arritur deri atje sa të përdoret një gjuhë që mund të dukej e kapërcyer dhe Komiteti është quajtur "një grup armiqësor".

KSHH ka qenë në mjaft raste në kontakt me Komitetin Maqedonas të Helsinkit dhe marrëdhëniet midis tyre janë karakterizuar nga një mirëkuptim i plotë. Ai ka vlerësuar veçanërsiht qëndrimin parimor të Komitetit Maqedonas në mbrojtje të të drejtave të njeriut duke denoncuar shkeljet e tyre me guxim.

Me presionet që po i bëhen Komitetit Maqedonas autoritetet e Shkupit veprojnë në kundërshtim me aktet kryesore ndërkombëtare të kësaj sfere, në të cilat Maqedonia është palë. Një ndër angazhimet e shteteve palë të këtyre akteve është njohja e organizatave joqeveritare të pavarura që veprojnë në fushën e të drejtave të njeriut, dhe shmangia e çdo ndërhyrjeje që do të pengonte veprimtarinë e tyre.

KSHH e denoncon këtë qëndrim të autoriteteve maqedonase si një kthim tek e kaluara. Ai shpreh solidaritet të plotë me Komitetin Maqedonas të Helsinkit dhe ka bindjen se ai do t'u qëndrojë presioneve dhe do të kryejë si deri tani me guxim e parimësi detyrën e tij si vëzhgues i paanshëm i të drejtave të njeriut në vendin e vet.