KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

NJË TJETËR TRAGJEDI NË KANALIN E OTRANTOS

QË SHTRON PËRGJEGJËSINË E SHTETIT

 13.03.2002  

Shtatë veta të tjerë gjetën vdekjen në kanalin e Otrantos si rezultat i përmbysjes së një skafi. Kohët e fundit ka pasur viktima të tjera që janë shkaktuar nga mbytja e gomoneve, kontrabandë që nisen nga brigjet shqiptare.

Autoritet përkatëse kanë bërë të njohura raste të ndalimit dhe të sekuestrimit të këtyre mjeteve të lundrimit, por del se kjo veprimtari kriminale vazhdon ende dhe gjithmonë viktima janë qytetarët e mjerë, që bien në grackën e mashtrimit.

Kjo ngjarje tjetër tronditëse shtron përgjegjësinë e shtetit përderisa ka ende gomone që nisen nga pika të ndryshme të bregdetit shqiptar. Del vetvetiu konkluzioni se ato i shpëtojnë kontrollit të organeve bregdetare.

Këto mjete lundrimi nuk janë objekte që mund t'i shpëtojnë lehtë vëzhgimit. Ato ia dalin përsëri të gjejnë vende për t'u strehuar dhe për të nisur, në momentin e përshtatshëm rrugën, që merr jetë njerëzish. Ngjarje të tilla tragjike nuk mund të ndodhin veçse kur mungon vëmendja e mjaftueshme për një veprimtari të tillë kriminale.

KSHH bëhet interpret i të gjithë opinionit publik për të shfaqur dhimbjen e thellë për viktimat e kësaj treagjedie të re. Në të njëjtën kohë, KSHH shpreh zhgënjim për mungesën e kontrollit të mjaftueshëm nga ana e organeve kompetente dhe bën thirrje për një goditje më të efektshme të këtij krimi.