KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

PROJEKTI

Ngritja dhe funksionimi i rrjetit të korrespondentëve të KSHH-së në disa rrethe të vendit

Duke filluar nga muaji janar 2002, KSHH-ja ka ngritur rrjetin e korrespondentëve të tij në disa rrethe të vendit, si: Kukës, Gjirokastër, Fier, Vlorë, Korçë, Elbasan, Shkodër.

 Qëllimi i ngritjes dhe i funksionimit të këtij rrjeti

Rrjeti i korrespondentëve të KSHH-së në disa rrethe të vendit u ngrit për të përmirësuar gjendjen e të drejtave të njeriut në rrethet përkatëse dhe për të forcuar nismat lokale në fushën e ndërgjegjësimit, të edukimit, të mbrojtjes dhe të respektimit të të drejtave të njeriut nëpërmjet rritjes së pjesëmarrjes së Komitetit Shqiptar të Helsinkit.

 Objektivat e rrjetit të korrespondentëve kanë qenë:

a)      Ndihmesa në përmirësimin e gjendjes së të drejtave të njeriut në rrethet e tyre.

b)      Nxitja dhe mbështetja e burimeve njerëzore dhe inciativat lokale në fushën e mbrojtjes së të drejtave të njeriut.

c)      Zgjerimi i veprimtarisë ndërgjegjësuese në kuadër të të drejtave të njeriut  në këto rrethe të vendit.

d)      Rritja e efektivitetit të veprimtarive vëzhguese të KSHH-së në një hapësirë më të madhe gjeografike.

 Veprimtari të zhvilluara në kuadër të këtij projekti:

-         Identifikimi i kandidaturave për korrespondentë, seleksionimi, intervistimi dhe përcaktimi i tyre. ( Janar –mars 2002)

-         Trajnimi i korrespondentëve për të drejtat e njeriut, metodologjinë e vëzhgimit në fushat e ndryshme të të drejtave të njeriut, raportimin dhe sensibilizimin e publikut dhe të institucioneve shtetërore. (28-29 mars 2002)

-         Marrja e letrave dhe e ankesave dhe verifikimi i rasteve.

-         Vëzhgimi i respektimit të të drejtave të shtetasve nga ana e policisë, nga institucionet e shërbimit shëndetësor parësor dhe e atij dytësor; respektimi i së drejtës së informimit të publikut nga organet e qeverisjes vendore; raporti i organeve të qeverisjes vendore me shtetasit; transparenca në marrjen e vendimeve nga ana e këtyre organeve dhe respektimi i të drejtave të punonjësve në marrëdhënie pune.

-         Organizimi i emisioneve në TV dhe në radiot lokale në të gjitha rrethet ku është shtrirë rrjeti i korrespondentëve.

-         Botimet informuese dhe sensibilizuese të publikut për misionin e KSHH-së dhe rrjetit të korrespondentëve, mënyra e kontaktimit të qytetarëve me përfaqësuesit e rrjetit.

-         Botime periodike të cilat pasqyrojnë probleme të ndryshme në fushën e të drejtave të njeriut.

-         Reagime publike të KSHH-së pas verifikimeve të bëra nga korrespondentët tanë në rast të shkeljeve të të drejtave të shtetasve shqiptarë.

-         Letra të hapura drejtuar institucioneve shtetërore përgjegjëse për të drejtat e shkelura të shtetasve shqiptarë, të cilat janë verifikuar si të tilla.

-         Organizimi i një takimi vlerësues dhe trajnues të korrespondentëve (12 tetor 2002)

-         Tryeza e rrumbullakët për vlerësimin e gjendjes së të drejtave të njeriut në disa rrethe të vendit (13 dhjetor 2002, Tiranë).

Përfituesit e rrjetit të korrespondentëve

a)                  Veprimtaria e korrespondentëve të KSHH-së në rrethe u ka krijuar shtetasve mundësi më të mëdha dhe më të shpejta për të paraqitur ankesat dhe për të zgjidhur shqetësimet e tyre në fushën e të drejtave të njeriut. 

b)                  Nëpërmjet këtij rrjeti është arritur një sensibilizim më i mirë i qytetarëve për të drejtat dhe rrugët e mbrojtjes së tyre.

c)                  Nga ana tjetër, Komiteti ka siguruar një informacion më të shpejtë për shkeljet e të drejtave të shtetasve në një zonë të caktuar, ka verifikuar dhe ka rritur efektivitetin e veprimtarisë së tij vëzhguese.

d)                  Nga funksionimi i rrjetit të korrespondentëve kanë përfituar publiku në tërësi dhe, në veçanti, ai i rretheve ku kanë ushtruar aktivitetin e tyre korrespondentët si edhe organet e administratës publike në këto rrethe të cilat, krahas kontrollit të brendshëm, kanë pasur edhe një vëzhgues të jashtëm.

e)                  Për herë të parë Komiteti Shqiptar i Helsinkit pati mundësinë të shtrinte praninë e tij në rrethe të tjera, përveç Tiranës.